महावितरणच्या तांत्रिक यंत्रणेला हायअलर्ट; अभियंते, यंत्रचालक व तारमार्ग कर्मचाऱ्यांना मुख्यालय न सोडण्याचे आदेश. वीजयंत्रणेच्या देखभालीवर विशेष भर.
राज्यात दुष्काळी परिस्थिती निर्माण झाल्याच्या पार्श्वभूमीवर महावितरणने आपल्या संपूर्ण तांत्रिक यंत्रणेला ‘हायअलर्ट’वर ठेवले आहे. दुष्काळ उपाययोजनांची प्रभावी अंमलबजावणी करण्यासाठी सर्व अभियंते, यंत्रचालक आणि तारमार्ग कर्मचाऱ्यांनी आपापल्या मुख्यालयात उपस्थित राहावे, असे सक्त आदेश देण्यात आले आहेत. कोणत्याही अधिकारी किंवा कर्मचाऱ्याला पूर्वपरवानगीशिवाय मुख्यालय सोडता येणार नाही, असे महावितरणने स्पष्ट केले आहे.
याबाबत महावितरणचे संचालक धनंजय औंढेकर यांनी नुकतेच परिपत्रक जारी केले आहे.
पर्जन्यमानातील तुटीमुळे दुष्काळी परिस्थिती
यंदाच्या जून महिन्यापासून राज्यात पर्जन्यमानात मोठी तूट नोंदविण्यात आल्याने राज्यातील बहुतांश भागात दुष्काळी परिस्थिती निर्माण झाली आहे. त्याचा परिणाम शेती पिकांवरही होत आहे. या परिस्थितीची दखल घेत राज्य शासनाने विविध उपाययोजना जाहीर केल्या आहेत. त्यानुसार महावितरणनेही राज्यभरातील आपली तांत्रिक यंत्रणा अधिक सतर्क केली आहे.
वरिष्ठ अधिकाऱ्यांकडून तांत्रिक यंत्रणेचा आढावा
मुख्यमंत्री यांचे अपर मुख्य सचिव तथा महावितरणचे अध्यक्ष व व्यवस्थापकीय संचालक लोकेश चंद्र यांच्या आदेशानुसार महावितरणचे संचालक धनंजय औंढेकर (संचालन), योगेश गडकरी (वाणिज्य), सचिन तालेवार (प्रकल्प) आणि राजेंद्र पवार (मानव संसाधन) यांच्यासह सर्व कार्यकारी संचालकांनी विविध परिमंडलांमध्ये तातडीने दौरे केले.
या दौऱ्यांदरम्यान दुष्काळी परिस्थितीत कृषिपंपांसह सर्व वर्गवारीतील ग्राहकांना सुरळीत वीजपुरवठा मिळण्यासाठी आवश्यक तांत्रिक कामांचा आढावा घेण्यात आला. तसेच विविध ठिकाणच्या वीजयंत्रणेची पाहणी करून आवश्यक त्या उपाययोजनांचे निर्देश संबंधित अधिकाऱ्यांना देण्यात आले.
वीजपुरवठा खंडित झाल्यास तातडीने दुरुस्ती
महावितरणने सर्व क्षेत्रीय कार्यालयांतील अभियंते, यंत्रचालक आणि तारमार्ग कर्मचाऱ्यांना आपापल्या मुख्यालयात उपस्थित राहण्याचे आदेश दिले आहेत. दुष्काळी परिस्थितीत शेतीसह इतर सर्व ग्राहकांसाठी महत्त्वाचा असलेला वीजपुरवठा सुरळीत राहील, यासाठी विशेष खबरदारी घेण्याच्या सूचना देण्यात आल्या आहेत.
एखाद्या कारणामुळे वीजपुरवठा खंडित झाल्यास पर्यायी व्यवस्थेद्वारे किंवा तातडीने दुरुस्तीची कामे करून वीजपुरवठा पूर्ववत करावा, असेही निर्देश देण्यात आले आहेत.
हयगय करणाऱ्यांवर शिस्तभंगाची कारवाई
वीजपुरवठा सुरळीत ठेवण्याच्या कामात कोणत्याही प्रकारची हयगय किंवा निष्काळजीपणा आढळल्यास संबंधित अधिकारी अथवा कर्मचाऱ्याविरुद्ध शिस्तभंगाची कारवाई करण्यात येईल, असे परिपत्रकात स्पष्ट करण्यात आले आहे.
दुष्काळी परिस्थितीत शेतीसह सर्व ग्राहकांना अखंडित आणि सुरळीत वीजपुरवठा मिळावा, यासाठी महावितरणच्या तांत्रिक यंत्रणेने सज्ज राहण्याचे निर्देश या आदेशातून देण्यात आले आहेत.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
