भदंत डॉ. एन. आनंद महाथेरो यांच्या धम्मदेसनेतून जळगावमध्ये धम्मदीक्षा दिनाचा संदेश. डॉ. बाबासाहेब आंबेडकरांच्या समता, सामाजिक परिवर्तन आणि बौद्ध धम्माच्या विचारांचे स्मरण.
धम्मदीक्षा दिनानिमित्त जळगाव रेल्वे स्थानकाजवळील बोधिसत्त्व, विश्वरत्न डॉ. बाबासाहेब आंबेडकर यांच्या पूर्णाकृती पुतळ्यास माल्यार्पण करून अभिवादन करण्यात आले. यावेळी त्रिशरण पंचशील ग्रहण करण्यात आले, तसेच धम्मदेसनेच्या माध्यमातून डॉ. बाबासाहेब आंबेडकर यांनी घडवून आणलेल्या ऐतिहासिक धम्मक्रांतीचे स्मरण करण्यात आले. पूज्य भदंत डॉ. एन. आनंद महाथेरो, महासंघनायक, भारत यांनी उपस्थितांना त्रिशरण पंचशील दिले. यावेळी झालेल्या घोषणांनी रेल्वे स्थानक परिसर दुमदुमून गेला.
या कार्यक्रमात माजी प्राचार्य यशवंतराव मोरे, प्रा. डॉ. सत्यजित साळवे, प्रा. प्रीतीलाल पवार, प्रा. बापुराव पानपाटील, प्रा. साहेबराव बागुल आणि माजी शिक्षण प्रशासन अधिकारी हरिश्चंद्र सोनवणे यांनी डॉ. बाबासाहेब आंबेडकर यांच्या पुतळ्यास माल्यार्पण करून अभिवादन केले. उपस्थितांनी बाबासाहेबांच्या विचारांचे स्मरण करत धम्मदीक्षा दिनाचे महत्त्व अधोरेखित केले.
रक्त न सांडता घडवली ऐतिहासिक धम्मक्रांती
धम्मदेसना देताना भदंत डॉ. एन. आनंद महाथेरो यांनी १४ ऑक्टोबर १९५६ रोजी डॉ. बाबासाहेब आंबेडकर यांनी नागपूर येथे लाखो अनुयायांना बौद्ध धम्माची दीक्षा देऊन ऐतिहासिक धम्मक्रांती घडवून आणल्याचे सांगितले. ही क्रांती सामाजिक परिवर्तनाचा आणि समतेच्या विचारांचा महत्त्वपूर्ण टप्पा असल्याचे त्यांनी नमूद केले.
बाबासाहेबांनी दिलेल्या बुद्धाच्या पंचशीलाचे आणि त्यांनी सांगितलेल्या २२ प्रतिज्ञांचे प्रत्येकाने पालन करावे, असे आवाहन भदंत डॉ. आनंद महाथेरो यांनी केले. तसेच, दरवर्षी १४ ऑक्टोबर हा धम्मदीक्षा दिन म्हणून साजरा करताना बाबासाहेबांचे विचार, त्यांचे सामाजिक कार्य आणि धम्मक्रांतीचा संदेश समाजातील अधिकाधिक लोकांपर्यंत पोहोचवावा, असेही त्यांनी सांगितले.
धम्माचरणात पती-पत्नींचा सहभाग महत्त्वाचा
माजी प्राचार्य यशवंतराव मोरे यांनी धम्माच्या कार्यक्रमांमध्ये सहभागी होताना पांढऱ्या वस्त्रांचा वापर करण्याचे आवाहन केले. पती-पत्नी दोघांनीही पांढरे कपडे परिधान करून धम्मविषयक कार्यक्रमांत सहभागी व्हावे, असे त्यांनी सांगितले. धम्माचरणातून विचार, आचरण आणि सामाजिक बांधिलकी दृढ करण्याचे महत्त्वही यावेळी अधोरेखित करण्यात आले.
विविध क्षेत्रांतील मान्यवरांची उपस्थिती
या कार्यक्रमाला चेतन नन्नवरे, आर. के. सुरवाडे, शालिक पानपाटील, नागोजी सोनवणे, रेखा सोनवणे, कांता बागुल, ज्योत्स्ना मोरे, रंजना पगारे, किशोर पगारे, वसंत सपकाळे, महेंद्र सोनवणे, बळवंत भालेराव, सिद्धार्थ सोनवणे, शैलेश सोनवणे, बाबुराव इंगळे, श्रीकांत तायडे, प्रा. तायडे, कैलास तायडे, सी. आर. सोनडवले (नागपूर), करुणा सोनवणे, सोनू तायडे, अभय सोनवणे आणि सम्यक इंगळे यांच्यासह एका मुस्लिम बांधवाची उपस्थिती होती.
कार्यक्रमाचे सूत्रसंचालन हरिश्चंद्र सोनवणे यांनी केले, तर चेतन नन्नवरे यांनी उपस्थितांचे आभार मानले. डॉ. बाबासाहेब आंबेडकर यांच्या विचारांचे स्मरण, त्रिशरण पंचशील ग्रहण आणि धम्मदेसनेच्या माध्यमातून धम्मदीक्षा दिनाचा संदेश समाजापर्यंत पोहोचविण्याचा प्रयत्न या कार्यक्रमातून करण्यात आला.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
