एमपीएससीच्या परीक्षा प्रक्रियेवरील विश्वास कायम ठेवण्यासाठी विद्यार्थ्यांचा जळगावमध्ये आक्रोश मोर्चा; ऑफलाइन परीक्षा आणि पारदर्शक प्रक्रियेची मागणी.
महाराष्ट्र लोकसेवा आयोगाच्या (एमपीएससी) विविध परीक्षांमध्ये कथित गैरप्रकार आणि अनियमितता होत असल्याचा आरोप करत स्पर्धा परीक्षांची तयारी करणाऱ्या विद्यार्थ्यांनी बुधवारी जळगावमध्ये ‘विद्यार्थी आक्रोश मोर्चा’ काढला. जी. एस. ग्राउंडपासून जिल्हाधिकारी कार्यालयापर्यंत काढण्यात आलेल्या या मोर्चात विद्यार्थ्यांनी परीक्षा प्रक्रियेत पारदर्शकता आणण्यासह विविध मागण्या प्रशासनासमोर मांडल्या.
स्पर्धा परीक्षांसाठी वर्षानुवर्षे मेहनत करणाऱ्या विद्यार्थ्यांच्या भवितव्याशी संबंधित प्रश्नांकडे गांभीर्याने पाहण्याची गरज असल्याचे आंदोलक विद्यार्थ्यांनी सांगितले. परीक्षा प्रक्रियेवरील विद्यार्थ्यांचा विश्वास कायम ठेवण्यासाठी आयोगाच्या कामकाजात अधिक पारदर्शकता आणि उत्तरदायित्व आवश्यक असल्याची भूमिका त्यांनी मांडली.
अध्यक्ष, सचिवांच्या राजीनाम्याची मागणी
आंदोलक विद्यार्थ्यांनी एमपीएससीचे अध्यक्ष आणि सचिव यांचा राजीनामा घेऊन त्यांच्या जागी तत्काळ स्वच्छ प्रतिमेच्या आयएएस अधिकाऱ्यांची नियुक्ती करावी, अशी मागणी केली. गट-ब परीक्षेबाबत उपस्थित करण्यात आलेल्या आक्षेपांवर आठ दिवसांत स्पष्टीकरण द्यावे तसेच गैरप्रकाराच्या आरोपांची चौकशी करावी, अशी मागणीही करण्यात आली.
राज्यसेवा मुख्य परीक्षा आणि कृषीसेवा परीक्षेतील वर्णनात्मक पेपरच्या तपासणीदरम्यान झालेल्या कथित चुकांची सखोल चौकशी करावी, अशी मागणी विद्यार्थ्यांनी केली. तसेच मुंबई क्राईम ब्रँचकडून एमपीएससीला देण्यात आलेला प्राथमिक चौकशी अहवाल सार्वजनिक करावा, अशी मागणीही मोर्चादरम्यान करण्यात आली.
संशयित अधिकाऱ्यांची चौकशी करण्याची मागणी
संशयित अधिकाऱ्यांच्या संपूर्ण प्रशासकीय सेवाकाळाची सखोल चौकशी करून त्यांच्या पदोन्नतीसंदर्भातील माहिती सार्वजनिक करावी, अशी मागणी आंदोलकांनी केली. तसेच संबंधित अधिकाऱ्यांच्या संपर्कात असलेल्या आणि विविध परीक्षांमध्ये निवड झालेल्या उमेदवारांच्या कॉल डिटेल रेकॉर्डची चौकशी करण्यात यावी, अशी मागणीही करण्यात आली.
कथित गैरप्रकारात सहभागी असलेल्या इतर एजंट्सचीही सखोल चौकशी करून दोष आढळल्यास नियमानुसार कारवाई करावी, अशी मागणी विद्यार्थ्यांनी केली. औषध निरीक्षक परीक्षेतील संशयास्पद निकाल तसेच उत्तीर्ण विद्यार्थ्यांचे फॉरेन्सिक ऑडिट करावे, अशी मागणीही यावेळी करण्यात आली.
परीक्षा पद्धतीत बदलाची मागणी
२६ ऑक्टोबर २०२६ रोजी होणारी गट-क पूर्व परीक्षा पूर्णपणे पारदर्शक आणि विश्वासार्ह पद्धतीने घेण्यात यावी, अशी मागणी विद्यार्थ्यांनी केली. एमपीएससीमार्फत घेण्यात येणाऱ्या सर्व परीक्षा ऑफलाइन पद्धतीने घेण्यात याव्यात, तसेच राज्यसेवा मुख्य परीक्षा वस्तुनिष्ठ बहुपर्यायी स्वरूपात घेण्यात यावी, अशी मागणीही आंदोलकांनी केली.
परीक्षा प्रक्रियेतील कोणत्याही प्रकारच्या अनियमिततेचा स्पर्धा परीक्षांची तयारी करणाऱ्या विद्यार्थ्यांच्या भवितव्यावर परिणाम होऊ नये, यासाठी आयोगाच्या कामकाजात पारदर्शकता, उत्तरदायित्व आणि विश्वासार्हता वाढविणे आवश्यक असल्याचे विद्यार्थ्यांनी सांगितले.
परीक्षा प्रक्रियेवरील विद्यार्थ्यांचा विश्वास पुन्हा निर्माण करण्यासाठी त्यांच्या मागण्यांचा गांभीर्याने विचार करून ठोस निर्णय घ्यावा, अशी अपेक्षा या मोर्चाच्या माध्यमातून व्यक्त करण्यात आली. तसेच ‘तुमच्या हक्काच्या लढ्यात मोठ्या संख्येने सहभागी व्हा!’ असे आवाहनही आंदोलक विद्यार्थ्यांकडून करण्यात आले.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
