NSS विभागाच्या पुढाकाराने वरणगाव महाविद्यालय परिसरात महाश्रमदान; स्वच्छता, सामाजिक बांधिलकी आणि गांधी-शास्त्री विचारांचा विद्यार्थ्यांमध्ये जागर.
येथील स्थानिक कला, विज्ञान आणि वाणिज्य महाविद्यालयात राष्ट्रीय सेवा योजना (NSS) विभागातर्फे १ ऑक्टोबर रोजी ‘स्वच्छता ही सेवा – SHS-2026’ अभियानांतर्गत ‘एक दिवस, एक तास, एक साथ’ या राष्ट्रव्यापी मोहिमेच्या निमित्ताने महाश्रमदान, स्वच्छता शपथ तसेच ‘महात्मा गांधी व लाल बहादूर शास्त्री व्याख्यानमाले’चे आयोजन करण्यात आले. 
महाविद्यालय परिसरात महाश्रमदान
सकाळी १० वाजता राष्ट्रीय सेवा योजना विभागाचे कार्यक्रम अधिकारी प्रा. राहुल जोहरे यांनी उपस्थित स्वयंसेवक, प्राध्यापक आणि शिक्षकेतर कर्मचाऱ्यांना स्वच्छतेची सामूहिक शपथ दिली. यावेळी मार्गदर्शन करताना त्यांनी स्वच्छता ही केवळ अभियानापुरती मर्यादित न ठेवता दैनंदिन जीवनाचा अविभाज्य भाग बनविण्याचे आवाहन केले.
यानंतर महाविद्यालयाचा परिसर, क्रीडांगण तसेच सार्वजनिक ठिकाणी सर्वांनी एकत्रितपणे एक तास महाश्रमदान केले. या स्वच्छता मोहिमेद्वारे परिसरातील प्लास्टिक व इतर कचरा संकलित करून परिसर स्वच्छ व प्लास्टिकमुक्त करण्याचा प्रयत्न करण्यात आला.
गांधी-शास्त्री विचारांची विद्यार्थ्यांना ओळख
स्वच्छता मोहिमेनंतर महाविद्यालयात ‘महात्मा गांधी आणि लाल बहादूर शास्त्री व्याख्यानमाले’चे आयोजन करण्यात आले. कार्यक्रमाच्या अध्यक्षस्थानी महाविद्यालयाचे प्राचार्य डॉ. नितीन इंगळे होते. 
अध्यक्षीय भाषणात प्राचार्य डॉ. नितीन इंगळे यांनी महात्मा गांधी यांच्या विचारांचे महत्त्व अधोरेखित केले. “राष्ट्रपिता महात्मा गांधीजींचे अहिंसेचे तत्त्व आपण सर्वांनी आपल्या दैनंदिन जीवनात अंगीकारले, तरच आपला आणि समाजाचा सर्वांगीण विकास होईल,” असे प्रतिपादन त्यांनी केले.
व्याख्यानमालेचे प्रमुख वक्ते राजू तायडे यांनी माजी पंतप्रधान लाल बहादूर शास्त्री यांच्या जीवनप्रवासावर प्रकाश टाकला. शास्त्रीजींचा साधेपणा, प्रामाणिकपणा आणि राष्ट्रनिष्ठ विचार आजच्या तरुण पिढीसाठी प्रेरणादायी असल्याचे सांगत, त्यांच्या विचारांचा अंगीकार करण्याची गरज त्यांनी स्पष्ट केली.
प्राध्यापक, कर्मचारी व विद्यार्थ्यांचा सहभाग
या कार्यक्रमास प्रा. अजित कलवले, प्रा. विकास उंबरकर, प्रा. मनीषा इंगळे, प्रा. रुपाली पाटील, प्रा. चेतन पाटील, प्रा. संदीप शिंदे, प्रा. विजय पाटील, प्रा. अरुणा गांगुर्डे आणि प्रा. रेवती पाटील यांच्यासह महाविद्यालयातील शिक्षकेतर कर्मचारी, NSS स्वयंसेवक आणि विद्यार्थी मोठ्या संख्येने उपस्थित होते.
संपूर्ण कार्यक्रमाचे सूत्रसंचालन रासेयो सह-कार्यक्रम अधिकारी प्रा. हेमराज मेटकर यांनी केले, तर प्रा. रजनी इंगळे यांनी उपस्थितांचे आभार मानले.
स्वच्छता, सामाजिक बांधिलकी आणि राष्ट्रपुरुषांच्या विचारांचा जागर विद्यार्थ्यांमध्ये निर्माण करणाऱ्या या संयुक्त उपक्रमाचे वरणगाव परिसरातून कौतुक होत आहे.
प्रा. राहुल जोहरे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवर लिखाण करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष लिखाणाच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात.
मो. क्र. +91 96041 53358 , इमेल – rahuljohare358@gmail.com
