लातूरमध्ये मुलींच्या डिजिटल सुरक्षेसाठी विशेष उपक्रम; विद्यार्थिनींना सायबर गुन्ह्यांचे धोके, सोशल इंजिनिअरिंग आणि सुरक्षित ऑनलाइन वर्तनाबाबत प्रात्यक्षिकांसह माहिती देण्यात आली.
आजच्या डिजिटल युगात मोबाईल, सोशल मीडिया, ऑनलाइन व्यवहार आणि इंटरनेटचा वापर मोठ्या प्रमाणात वाढला आहे. त्याचबरोबर ऑनलाइन फसवणूक, बनावट लिंक, ओटीपी फसवणूक, सोशल मीडिया अकाउंट हॅकिंग, फोटो मॉर्फिंग, फिशिंग तसेच वैयक्तिक माहितीच्या गैरवापराचे धोकेही वाढत आहेत. या पार्श्वभूमीवर मुलींच्या डिजिटल सुरक्षेबाबत जागरूकता निर्माण करण्याच्या उद्देशाने क्विक हील फाउंडेशनच्या मार्गदर्शनाखाली राजर्षी शाहू महाविद्यालय, लातूर येथील विद्यार्थ्यांच्या वतीने एसएसके गर्ल्स हॉस्टेल, लातूर येथे सायबर सुरक्षा जनजागृती कार्यक्रमाचे आयोजन करण्यात आले.
या कार्यक्रमात नेहल बुलाणी, नम्रता तोर आणि जाधव साहील यांनी हॉस्टेलमधील विद्यार्थिनींशी संवाद साधत मोबाईलचा सुरक्षित वापर, सोशल मीडिया अकाउंटची सुरक्षा, मजबूत पासवर्ड, अनोळखी लिंकपासून सावध राहणे, ओटीपी कोणालाही न सांगणे, अनोळखी व्यक्तींशी ऑनलाइन संवाद साधताना घ्यावयाची काळजी, लोकेशन शेअरिंग तसेच वैयक्तिक फोटो आणि माहिती ऑनलाइन शेअर करण्याचे धोके याबाबत मार्गदर्शन केले.
केवळ माहिती देण्यापुरता कार्यक्रम मर्यादित न ठेवता विद्यार्थिनींना सायबर गुन्हे कोणत्या पद्धतीने घडू शकतात, याची जाणीव करून देण्यासाठी टीमने लाईव्ह हॅकिंगचे प्रात्यक्षिक सादर केले. सायबर गुन्हेगार निष्काळजीपणाचा फायदा कसा घेऊ शकतात, बनावट लिंक किंवा सोशल इंजिनिअरिंगच्या माध्यमातून माहिती मिळवण्याचा प्रयत्न कसा केला जाऊ शकतो, तसेच डिजिटल जगात वैयक्तिक माहिती सुरक्षित ठेवण्यासाठी कोणत्या खबरदारीच्या उपाययोजना आवश्यक आहेत, हे प्रात्यक्षिकांच्या माध्यमातून सोप्या भाषेत समजावून सांगण्यात आले.
कार्यक्रमाच्या माध्यमातून विद्यार्थिनींना “डिजिटल स्वातंत्र्यासोबत डिजिटल जबाबदारीही तितकीच महत्त्वाची आहे” हा संदेश देण्यात आला. मोबाईल आणि इंटरनेट हे ज्ञान, शिक्षण व संवादाचे प्रभावी साधन असले, तरी त्यांचा निष्काळजीपणे वापर केल्यास गंभीर धोके निर्माण होऊ शकतात, याबाबत विद्यार्थिनींमध्ये जागरूकता निर्माण करण्यात आली.
या उपक्रमाला एसएसके गर्ल्स हॉस्टेलचे अध्यक्ष सह्यासकराड यांची उपस्थिती लाभली. त्यांनी कार्यक्रमाबद्दल सकारात्मक प्रतिक्रिया व्यक्त करत, हॉस्टेलमध्ये राहणाऱ्या मुलींसाठी डिजिटल सुरक्षा हा अत्यंत महत्त्वाचा विषय असून शिक्षणासोबत ऑनलाइन जगात सुरक्षितपणे वावरण्याचे ज्ञान असणे आवश्यक असल्याचे मत व्यक्त केले.
हॉस्टेल प्रशासनाने विद्यार्थिनींच्या सुरक्षेच्या दृष्टीने या कार्यक्रमाच्या आयोजनासाठी सकारात्मक पुढाकार घेतला. कार्यक्रमाला विद्यार्थिनींचा उत्स्फूर्त प्रतिसाद मिळाला. मोठ्या संख्येने विद्यार्थिनींनी सहभाग नोंदवत सायबर सुरक्षेबाबत विविध प्रश्न विचारले.
क्विक हील फाउंडेशन आणि राजर्षी शाहू महाविद्यालय, लातूर यांच्या संयुक्त प्रयत्नातून राबविण्यात आलेल्या या उपक्रमाचा उद्देश विद्यार्थिनींना केवळ सायबर गुन्ह्यांपासून सावध करणे नसून त्यांच्यामध्ये डिजिटल जबाबदारी, सजगता आणि सुरक्षित ऑनलाइन वर्तनाची सवय निर्माण करणे हा होता.
मुलींच्या सुरक्षित भविष्यासाठी शिक्षणासोबतच डिजिटल सुरक्षेचे शिक्षण देणे ही आजची गरज आहे. या उद्देशाने एसएसके गर्ल्स हॉस्टेलमध्ये आयोजित करण्यात आलेला हा सायबर सुरक्षा जनजागृती उपक्रम विद्यार्थिनींसाठी मार्गदर्शक आणि उपयुक्त ठरला.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
