जळगाव आरटीओतील वाहन व्यवहारांचा तांत्रिक अडथळा दूर करण्याची मागणी; महा पीपी ॲप पूर्ववत सुरू करावे किंवा पर्यायी व्यवस्था उपलब्ध करून द्यावी, अशी वाहनमालकांची मागणी.
जळगाव : आरटीओच्या वाहन खरेदी-विक्री प्रक्रियेत ‘महा पीपी’ ॲप गेल्या सहा महिन्यांपासून बंद असल्याने वाहनमालक आणि एजंटांसमोर मोठी अडचण निर्माण झाली आहे. या ॲपच्या माध्यमातून यापूर्वी वाहन खरेदी-विक्रीचे व्यवहार तसेच शासकीय कराचा भरणा करण्यात आला होता. मात्र, ॲप बंद झाल्यानंतर भरलेल्या कराची माहिती किंवा संबंधित प्रमाणपत्र आरटीओच्या अन्य यंत्रणेत उपलब्ध होत नसल्याची तक्रार वाहनमालक आणि एजंटांकडून करण्यात येत आहे.
कर भरला, तरी पुन्हा भरण्याचा तगादा
वाहनमालकांकडे कर भरल्याची पावती असतानाही आरटीओकडून पुन्हा कर भरण्याचा तगादा लावला जात असल्याचा आरोप करण्यात येत आहे. कराची नोंद उपलब्ध नसल्याने वाहनांच्या पुढील खरेदी-विक्री प्रक्रियेला अडथळा निर्माण होत आहे.
वाहन हस्तांतरणाची प्रक्रिया पूर्ण न झाल्याने अनेक ट्रक आणि अन्य व्यावसायिक वाहने रस्त्यावर उभी राहण्याची वेळ आली आहे. परिणामी वाहनमालकांना दररोज आर्थिक नुकसान सहन करावे लागत असल्याचे सांगण्यात येत आहे.
आरटीओ नोंदी आणि भरलेल्या कराचा मेळ कधी?
‘महा पीपी’ ॲपद्वारे भरलेल्या कराची माहिती उपलब्ध करून देण्यासाठी आरटीओकडे पर्यायी व्यवस्था का करण्यात आली नाही, असा सवाल एजंटांकडून उपस्थित केला जात आहे. भरलेल्या कराच्या पावत्या ग्राह्य धरून वाहन व्यवहार पूर्ण करण्याची सुविधा उपलब्ध करून द्यावी, अशी मागणीही करण्यात येत आहे.
आरटीओच्या नोंदी आणि यापूर्वी भरलेल्या कराच्या रकमेचा ताळमेळ होत नसल्याने ही समस्या निर्माण झाल्याचे एजंटांचे म्हणणे आहे. त्यामुळे वाहनमालकांकडून पुन्हा कर वसूल करण्याऐवजी जुन्या नोंदी तपासून तातडीने व्यवहार मार्गी लावावेत, अशी मागणी जोर धरत आहे.
वाहनमालकांचे आर्थिक नुकसान
व्यावसायिक वाहनांचा वापर थांबल्याने मालवाहतूक व्यवसायावरही त्याचा परिणाम होत आहे. वाहन खरेदी-विक्री, मालकी हस्तांतरण आणि कर भरण्याच्या प्रक्रियेत निर्माण झालेला हा तांत्रिक अडथळा लवकर दूर न झाल्यास वाहनमालकांचे आर्थिक नुकसान वाढण्याची शक्यता आहे.
‘महा पीपी’ ॲप पूर्ववत सुरू करावे किंवा त्याला पर्यायी सक्षम व्यवस्था उपलब्ध करून द्यावी, तसेच यापूर्वी भरलेल्या कराची माहिती आरटीओच्या प्रणालीत तातडीने अद्ययावत करावी, अशी मागणी वाहनमालक आणि एजंटांकडून करण्यात येत आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
