ज्येष्ठ नागरिकांना ऑनलाइन फसवणूक, लोकेशन परवानगी आणि सुरक्षित मोबाईल ॲप्सबाबत मार्गदर्शन; “तंत्रज्ञानाचा वापर करा, पण सुरक्षितपणे करा”चा संदेश.
डिजिटल तंत्रज्ञानाचा वाढता वापर आणि त्यासोबत वाढणाऱ्या ऑनलाइन फसवणुकीच्या पार्श्वभूमीवर ज्येष्ठ नागरिकांमध्ये डिजिटल सुरक्षिततेबाबत जागरूकता निर्माण करण्याच्या उद्देशाने खाटू श्याम मंदिर येथे विशेष सायबर सुरक्षा जनजागृती सत्राचे आयोजन करण्यात आले. या सत्राला परिसरातील ८० ते ९० ज्येष्ठ नागरिकांनी उत्स्फूर्त सहभाग नोंदविला.
या उपक्रमात ज्येष्ठ नागरिकांना दैनंदिन जीवनात वापरल्या जाणाऱ्या मोबाईल ॲप्सच्या सुरक्षित वापराबाबत सोप्या भाषेत मार्गदर्शन करण्यात आले. कोणते ॲप सुरक्षित आहे, ॲप इन्स्टॉल करताना कोणती काळजी घ्यावी, कोणत्या ॲपला लोकेशनची आवश्यकता असते आणि कोणत्या ॲपला अनावश्यकपणे लोकेशन परवानगी देऊ नये, याबाबत माहिती देण्यात आली.
डिजिटल व्यवहारात सावधगिरीचा संदेश
डिजिटल व्यवहार करताना कोणती खबरदारी घ्यावी, अनोळखी लिंक किंवा संदेशांपासून कसे सावध राहावे तसेच वैयक्तिक आणि आर्थिक माहिती सुरक्षित कशी ठेवावी, याबाबतही उपस्थितांना मार्गदर्शन करण्यात आले. सायबर गुन्ह्यांपासून स्वतःचे संरक्षण करण्यासाठी डिजिटल माध्यमांचा वापर करताना सतर्क राहण्याचे आवाहन करण्यात आले.
या उपक्रमासाठी श्री. राजेश मित्तल यांचे विशेष सहकार्य व मार्गदर्शन लाभले. त्यांच्या सहकार्यामुळे ज्येष्ठ नागरिकांपर्यंत सायबर सुरक्षेचा संदेश प्रभावीपणे पोहोचविण्यास मदत झाली.
“ज्येष्ठ नागरिकांसाठी अशी जनजागृती आवश्यक”
यावेळी प्रतिक्रिया व्यक्त करताना राजेश मित्तल म्हणाले की, हे सत्र अत्यंत प्रभावी आणि उपयुक्त ठरले. आजच्या काळात ज्येष्ठ नागरिकांसाठी डिजिटल सुरक्षा जनजागृती आवश्यक असून, केवळ ज्येष्ठ नागरिकांसाठीच नव्हे तर आगामी पिढीसाठीही डिजिटल सुरक्षिततेचे ज्ञान महत्त्वाचे आहे. या कार्यासाठी संपूर्ण टीमला त्यांनी शुभेच्छा दिल्या.
Quick Heal Foundationच्या सहकार्याने उपक्रम
हा जनजागृती उपक्रम Quick Heal Foundationच्या सहकार्याने आणि राजर्षी शाहू महाविद्यालयाच्या विद्यार्थ्यांच्या पुढाकारातून राबविण्यात आला. या उपक्रमात जाधव साहिल, परमेश्वर पांद्रे, नम्रता तोर, नेहल बुलाणी आणि श्रेयश मकणे यांनी सक्रिय सहभाग घेतला.
डिजिटल तंत्रज्ञानाचा वापर वाढत असताना त्यासोबत सुरक्षिततेची जाणीव निर्माण करणे ही काळाची गरज आहे. विशेषतः ज्येष्ठ नागरिकांना डिजिटल जगाशी सुरक्षितपणे जोडण्यासाठी अशा प्रकारचे मार्गदर्शन उपयुक्त ठरत आहे.
“तंत्रज्ञानाचा वापर करा, पण सुरक्षितपणे करा,” हा महत्त्वपूर्ण संदेश या सायबर सुरक्षा जनजागृती उपक्रमातून देण्यात आला.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
