क्विक हील फाउंडेशनच्या सायबर सुरक्षा जनजागृती उपक्रमाला अशोक भायती इंग्लिश हायस्कूलमध्ये उत्स्फूर्त प्रतिसाद; विद्यार्थी आणि शिक्षकांनी जाणून घेतले डिजिटल सुरक्षेचे धडे.
अशोक भायती इंग्लिश हायस्कूल, निलंगा येथे क्विक हील फाउंडेशनच्या वतीने सायबर सुरक्षा जनजागृती कार्यक्रमाचे आयोजन करण्यात आले. यावेळी सायबर सुरक्षा तज्ज्ञ साहिल जाधव यांनी विद्यार्थी, प्राचार्य आणि शिक्षकांना प्रत्यक्ष हॅकिंगचे प्रात्यक्षिक दाखवून सायबर गुन्हे कोणत्या पद्धतीने घडू शकतात, याबाबत मार्गदर्शन केले.
प्रत्यक्ष प्रात्यक्षिकाच्या माध्यमातून विद्यार्थ्यांसह प्राचार्य आणि शिक्षकांना सायबर सुरक्षेचे विविध पैलू समजावून सांगण्यात आले. ऑनलाइन फसवणूक, अनोळखी लिंक, ओटीपी, संकेतशब्द तसेच समाजमाध्यमांचा सुरक्षित वापर करताना कोणती खबरदारी घ्यावी, याबाबतही सविस्तर माहिती देण्यात आली.
प्रत्यक्ष हॅकिंगचे प्रात्यक्षिक पाहताना उपस्थित विद्यार्थी आणि शिक्षकांनी उत्स्फूर्त प्रतिसाद दिला. डिजिटल माध्यमांचा वापर करताना निष्काळजीपणा केल्यास सायबर फसवणुकीला सामोरे जावे लागू शकते, त्यामुळे प्रत्येकाने डिजिटल सुरक्षिततेबाबत सतर्क राहणे आवश्यक असल्याचे यावेळी स्पष्ट करण्यात आले.
या उपक्रमाबद्दल विद्यालयाचे प्राचार्य, सर्व शिक्षक आणि उपस्थित मान्यवरांनी साहिल जाधव यांच्या सायबर सुरक्षा जनजागृतीच्या कार्याचे कौतुक केले. युवकांनी समाजामध्ये सायबर सुरक्षेबाबत जागरूकता निर्माण करण्यासाठी घेतलेला पुढाकार महत्त्वपूर्ण असल्याचे उपस्थितांनी नमूद केले.
शिवसेना तालुका प्रमुख प्रभात बालासे पाटील यांच्या उपस्थितीत हा सायबर सुरक्षा जनजागृती कार्यक्रम उत्साहात पार पडला. क्विक हील फाउंडेशनच्या वतीने राबविण्यात येणाऱ्या अशा उपक्रमांमुळे विद्यार्थ्यांसह शिक्षकांमध्येही डिजिटल सुरक्षिततेबाबत जागरूकता निर्माण होत असल्याचे यावेळी सांगण्यात आले.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
