किनगावमधील संचलनाबाबत समाजमाध्यमांवरील दाव्यांची निष्पक्ष चौकशी करण्याची मागणी. अनिल अडकमोल यांच्या नेतृत्वाखाली रिपब्लिकन पार्टी ऑफ इंडिया (आ.) ने निवेदन सादर केले.
जळगाव : किनगाव येथे राष्ट्रीय स्वयंसेवक संघाच्या वतीने काढण्यात आलेल्या संचलनाबाबत समाजमाध्यमांवर चुकीची माहिती प्रसारित केली जात असल्याचा आरोप करत रिपब्लिकन पार्टी ऑफ इंडिया (आ.) च्या वतीने जिल्हा प्रशासनाला निवेदन देण्यात आले. या प्रकरणाची निष्पक्ष चौकशी करून अपप्रचार करणाऱ्यांसह दोषी आढळणाऱ्यांवर कायदेशीर कारवाई करावी, अशी मागणी निवेदनाद्वारे करण्यात आली. पक्षाचे महानगराध्यक्ष तथा नगरसेवक अनिल अडकमोल यांच्या नेतृत्वाखाली हे निवेदन सादर करण्यात आले.
निवेदनात नमूद केल्यानुसार, किनगाव येथे स्थानिक नागरिकांनी एकत्र येत शांततेत आणि शिस्तबद्ध पद्धतीने संचलन काढले होते. मात्र, या संचलनासाठी बाहेरून लोकांना बोलावण्यात आल्याची चुकीची माहिती समाजमाध्यमांवर प्रसारित केली जात असल्याची तक्रार पक्षाच्या वतीने करण्यात आली आहे. अशा अप्रमाणित माहितीमुळे गावातील नागरिकांमध्ये गैरसमज निर्माण होऊन सामाजिक सलोखा बिघडण्याची शक्यता असल्याचेही निवेदनात म्हटले आहे.
दोषींवर कायदेशीर कारवाईची मागणी
संचलनादरम्यान बेकायदेशीर अडथळे निर्माण करणारे, पोलिसांच्या कर्तव्यात अडथळा आणणारे तसेच जाणीवपूर्वक चुकीची माहिती प्रसारित करणारे व्यक्ती चौकशीत दोषी आढळल्यास त्यांच्यावर कायद्यानुसार कारवाई करावी, अशी मागणी निवेदनातून करण्यात आली आहे.
सामाजिक सलोखा कायम राखण्याचे आवाहन
अनिल अडकमोल यांच्या नेतृत्वाखाली निवेदन सादर करताना भीमराव साळुंके, प्रताप बनसोडे, अक्षय मेघे, किशोर अडकमोल, नंदा बिऱ्हाडे, शोभा दामोदरे आणि आशा सोनावणे यांच्यासह पक्षाचे पदाधिकारी, कार्यकर्ते व महिला पदाधिकारी उपस्थित होते.
किनगावमधील शांतता, सामाजिक सलोखा आणि सर्व नागरिकांचा सन्मान कायम राहणे आवश्यक आहे. या प्रकरणाची चौकशी करताना कोणत्याही निरपराध व्यक्तीवर अन्याय होऊ नये, अशी अपेक्षाही रिपब्लिकन पार्टी ऑफ इंडिया (आ.) च्या वतीने व्यक्त करण्यात आली.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
