मालमत्तेच्या वादातून हल्ल्याचा कट रचल्याचा आरोप असलेल्या प्रकरणात छोटा राजनसह पाच जणांची न्यायालयाकडून निर्दोष सुटका.
मुंबई : शिवसेना नेते अजय भोसले यांच्यावर २००९ मध्ये झालेल्या प्राणघातक हल्ल्याच्या प्रकरणात छोटा राजन याच्यासह पाच आरोपींची विशेष सीबीआय न्यायालयाने निर्दोष सुटका केली आहे. आरोपींविरुद्धचे आरोप सिद्ध करण्यात सरकारी पक्षाला यश न आल्याने विशेष सीबीआय न्यायालयाचे न्यायाधीश नरेंद्रनाथ प्रधान यांनी हा निर्णय दिला.
११ ऑक्टोबर २००९ रोजी निवडणूक प्रचारादरम्यान पुण्यातील कोरेगाव परिसरात मोटारसायकलवरून आलेल्या हल्लेखोरांनी अजय भोसले यांच्यावर गोळीबार केला होता. या हल्ल्यात भोसले बचावले; मात्र त्यांच्या स्कॉर्पिओ गाडीच्या चालकाला गोळी लागून तो जखमी झाला होता. या घटनेमुळे त्या वेळी परिसरात खळबळ उडाली होती.
या प्रकरणात छोटा राजन याच्यासह व्यावसायिक सुरेंद्र अग्रवाल, शकीब आलम खान, राजेश यादव आणि विजय पुरुषोत्तम साळवी यांच्यावर आरोप ठेवण्यात आले होते. मात्र, न्यायालयात आरोप सिद्ध न झाल्याने या पाचही आरोपींची सर्व आरोपांतून निर्दोष मुक्तता करण्यात आली.
मालमत्तेच्या वादातून हल्ल्याचा कट रचल्याचा आरोप
सरकारी पक्षाच्या आरोपानुसार, सुरेंद्र अग्रवाल आणि त्याचे भाऊ आर. के. अग्रवाल व व्ही. के. अग्रवाल यांच्यात कौटुंबिक मालमत्तेवरून वाद सुरू होता. या वादातून सुरेंद्र अग्रवाल याने छोटा राजनच्या कथित साथीदाराच्या मदतीने आर. के. अग्रवाल यांच्यावर मालमत्तेतील अपेक्षित हिस्सा देण्यासाठी दबाव आणण्याचा प्रयत्न केल्याचा आरोप होता. अजय भोसले हे आर. के. अग्रवाल यांचे मित्र असल्याने त्यांना लक्ष्य करण्यात आल्याचे सरकारी पक्षाने न्यायालयात म्हटले होते.
२०१५ मध्ये प्रकरणाचा तपास सीबीआयकडे
या प्रकरणाचा तपास सुरुवातीला पुण्यातील बंड गार्डन पोलीस ठाण्याकडून करण्यात आला होता. मात्र, २०१५ मध्ये छोटा राजन याला भारतात आणल्यानंतर त्याच्याविरुद्धच्या ७१ प्रकरणांपैकी हे प्रकरण महाराष्ट्र सरकारच्या आदेशानुसार सीबीआयकडे सोपविण्यात आले होते. त्यानंतर सीबीआयने या प्रकरणाचा तपास करून न्यायालयात आरोपपत्र दाखल केले होते.
दरम्यान, छोटा राजन सध्या तिहार तुरुंगात असून, मुंबईतील पत्रकार जे. डे यांच्या हत्या प्रकरणात जन्मठेपेची शिक्षा भोगत आहे. याशिवाय त्याला अन्य अनेक गुन्हेगारी प्रकरणांमध्येही दोषी ठरविण्यात आले आहे.
अजय भोसले यांच्यावरील हल्ल्याच्या या प्रकरणात पुराव्याअभावी छोटा राजनसह पाच आरोपींची निर्दोष सुटका झाल्याने या खटल्याचा निकाल चर्चेचा विषय ठरला आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
