खामगावातील संत तुकाराम भवन येथे दिव्यांगांसाठी मोफत कृत्रिम अवयव मोजमाप शिबिर. जयंत आणि शेखर यांच्याशी संपर्क साधून पूर्वनोंदणी करा.
खामगाव : दिव्यांग व्यक्तींना स्वावलंबी जीवन जगण्यासाठी आवश्यक कृत्रिम अवयव उपलब्ध करून देण्याच्या सामाजिक उद्देशाने खामगाव येथे रविवार, दि. २२ नोव्हेंबर २०२६ रोजी मोफत दिव्यांग शिबिराचे आयोजन करण्यात आले आहे. या शिबिरात दिव्यांग व्यक्तींसाठी आधुनिक कृत्रिम मॉड्युलर पाय व हात तसेच कॅलिपर यांचे मोजमाप मोफत करण्यात येणार आहे. विशेष म्हणजे, बाजारात ५० हजार रुपयांपेक्षा अधिक व्यावसायिक किंमत असलेला आधुनिक कृत्रिम मॉड्युलर पाय पात्र दिव्यांग व्यक्तींना विनामूल्य उपलब्ध करून देण्यात येणार आहे.
महाराष्ट्र नॅचरल गॅस लिमिटेड (MNGL) यांच्या सीएसआर निधीअंतर्गत रोटरी क्लब ऑफ खामगाव व डिस्ट्रिक्ट ३०३०, श्री तिरुपती बालाजी देवस्थानम, खामगाव यांच्या सहकार्याने या उपक्रमाचे आयोजन करण्यात आले आहे. भारत विकास परिषद, खामगाव आणि दिव्यांग केंद्र, पुणे यांच्या संयुक्त विद्यमाने हे शिबिर पार पडणार आहे.
हे शिबिर रविवार, २२ नोव्हेंबर २०२६ रोजी सकाळी ९ ते दुपारी ३ या वेळेत संत तुकाराम भवन मंगल कार्यालय, माधव नगर, खामगाव येथे आयोजित करण्यात आले आहे. शिबिरामध्ये भारतीय पुनर्वास परिषदेकडे नोंदणीकृत प्रोस्थेटिस्ट अँड ऑर्थोटिस्ट (P&O) अर्थात कृत्रिम अवयव व सहाय्यक उपकरणांशी संबंधित पुनर्वसन व्यावसायिकांच्या देखरेखीखाली आवश्यक मोजमाप व तपासणी करण्यात येणार आहे.
या शिबिराचा लाभ घेण्यासाठी दिव्यांग व्यक्तींनी पूर्वनोंदणी करणे अनिवार्य आहे. पूर्वनोंदणीशिवाय शिबिरात प्रवेश दिला जाणार नसल्याचे आयोजकांनी स्पष्ट केले आहे. त्यामुळे खामगाव व परिसरातील तसेच बुलढाणा जिल्ह्यातील गरजू दिव्यांग व्यक्तींनी वेळेत नोंदणी करून या उपक्रमाचा लाभ घ्यावा, असे आवाहन करण्यात आले आहे.
पूर्वनोंदणीसाठी संपर्क क्रमांक :
- जयंत : ९६१९३ ३१४६०
- शेखर : ९८२३० २४२३२
तसेच आपल्या परिचयातील गरजू दिव्यांग व्यक्तींना या शिबिराची माहिती देऊन त्यांची पूर्वनोंदणी करून घेण्याचे आवाहन आयोजकांनी केले आहे. शिबिरासाठी येणाऱ्या दिव्यांग व्यक्ती व त्यांच्यासोबत येणाऱ्या एका सहकाऱ्यासाठी मोफत भोजनाची व्यवस्थाही करण्यात आली आहे.
दिव्यांग व्यक्तींना आधुनिक कृत्रिम अवयवांच्या माध्यमातून अधिक सक्षम आणि स्वावलंबी बनविण्याच्या दृष्टीने हा उपक्रम महत्त्वपूर्ण ठरणार आहे. आर्थिक परिस्थितीमुळे महागडी कृत्रिम उपकरणे घेणे शक्य नसलेल्या गरजू व्यक्तींसाठी हे शिबिर मोठी संधी ठरू शकते. त्यामुळे जास्तीत जास्त पात्र दिव्यांग व्यक्तींनी पूर्वनोंदणी करून या मोफत शिबिराचा लाभ घ्यावा, असे आवाहन आयोजक संस्थांच्या वतीने करण्यात आले आहे.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
