बर्ड फ्लूचा धोका लक्षात घेऊन जळगाव मनपाची तातडीची बैठक; नागरिकांच्या आरोग्य सुरक्षेसाठी चिकन मार्केट व पोल्ट्री फार्मवर विशेष नजर.
नवापूर परिसरात बर्ड फ्लूचा संसर्ग वाढत असल्याच्या पार्श्वभूमीवर जळगाव शहरात प्रतिबंधात्मक उपाययोजना अधिक कडक करण्यात आल्या आहेत. शहरातील नागरिकांच्या आरोग्याच्या सुरक्षेसाठी उपमहापौर मनोज सुरेश चौधरी यांनी महानगरपालिकेच्या आरोग्य विभागाची तातडीची आढावा बैठक घेत विविध महत्त्वाच्या सूचना दिल्या.
बैठकीत शहरातील सर्व चिकन दुकाने, मांस विक्री केंद्रे आणि पोल्ट्री फार्मचे विशेष सर्वेक्षण करण्याचे आदेश देण्यात आले. तसेच नवापूरसारख्या बाधित भागांतून येणाऱ्या पोल्ट्री वाहनांची कडक तपासणी करण्याच्या सूचनाही प्रशासनाला करण्यात आल्या.
उपमहापौरांनी संशयास्पद परिस्थिती हाताळण्यासाठी आरोग्य विभागाची विशेष पथके नियुक्त करण्याचे निर्देश दिले. मृत किंवा आजारी पक्षी आढळल्यास त्यांची वैज्ञानिक पद्धतीने विल्हेवाट लावण्यास सांगण्यात आले आहे.
याशिवाय शहरातील चिकन मार्केट आणि कत्तलखान्यांमध्ये नियमित निर्जंतुकीकरण व फवारणी करण्याच्या सूचना देण्यात आल्या आहेत. नागरिकांनी अफवांवर विश्वास न ठेवता मांस व अंडी पूर्णपणे शिजवूनच सेवन करावे, यासाठी जनजागृती मोहीमही राबविण्यात येणार आहे.
शहरातील रुग्णालये आणि आरोग्य केंद्रांना आवश्यक औषधसाठा व सुरक्षा साहित्य उपलब्ध ठेवण्याचे निर्देश देण्यात आले असून श्वसनासंबंधी त्रास असलेल्या रुग्णांवर विशेष लक्ष ठेवण्यास सांगितले आहे.
“जळगावच्या नागरिकांच्या आरोग्याशी कोणतीही तडजोड केली जाणार नाही. प्रशासनाच्या कामात हलगर्जीपणा आढळल्यास संबंधितांवर कठोर कारवाई करण्यात येईल,” असा इशारा उपमहापौर मनोज चौधरी यांनी दिला.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
