स्वाधार योजना २०२६-२७ साठी विद्यार्थ्यांनी ऑनलाइन अर्ज अद्ययावत करण्याचे आवाहन. अनुसूचित जाती व नवबौद्ध विद्यार्थ्यांसाठी अर्जाची अंतिम मुदत १५ सप्टेंबर २०२६.
सामाजिक न्याय विभागाच्या शासकीय वसतिगृहात प्रवेश घेण्यास पात्र असलेल्या, परंतु शासकीय वसतिगृहात प्रवेश न मिळालेल्या अनुसूचित जाती व नवबौद्ध घटकांतील विद्यार्थ्यांसाठी भारतरत्न डॉ. बाबासाहेब आंबेडकर स्वाधार योजना सुरू करण्यात आली आहे. या योजनेचा लाभ घेण्यासाठी विद्यार्थ्यांनी सन २०२६-२७ या वर्षासाठी ऑनलाइन अर्ज करावेत. अर्ज करण्याची अंतिम मुदत १५ सप्टेंबर २०२६ आहे.
सन २०२४-२५ पासून भारतरत्न डॉ. बाबासाहेब आंबेडकर स्वाधार योजना ऑनलाइन पद्धतीने राबविण्यात येत आहे. यापूर्वी ही योजना जिल्हास्तरावर लागू होती. शासन निर्णय दि. २६ डिसेंबर २०२४ अन्वये ती तालुकास्तरावरही लागू करण्यात आली आहे.
सामाजिक न्याय विभागाच्या शासकीय वसतिगृहात प्रवेश घेण्यास पात्र असूनही प्रवेश न मिळाल्याने निवास, भोजन व अन्य सुविधांअभावी पुढील शिक्षण घेता न येणाऱ्या अनुसूचित जाती व नवबौद्ध घटकांतील विद्यार्थ्यांना या योजनेचा लाभ दिला जातो. इयत्ता ११ वी व १२ वी तसेच इयत्ता १० वी व १२ वी नंतरच्या व्यावसायिक व बिगर व्यावसायिक अभ्यासक्रमांमध्ये विविध स्तरांवरील महाविद्यालये व शिक्षण संस्थांमध्ये प्रवेश घेतलेल्या पात्र विद्यार्थ्यांना या योजनेअंतर्गत मागासवर्गीय शासकीय वसतिगृहातील विद्यार्थ्यांप्रमाणे भोजन, निवास, शैक्षणिक साहित्य, निर्वाह भत्ता व इतर आवश्यक सुविधा स्वतः उपलब्ध करून घेण्यासाठी ठराविक रक्कम त्यांच्या आधार संलग्न बँक खात्यावर थेट जमा करण्यात येते.
मागील वर्षातील स्वाधार योजनेचे विद्यमान विद्यार्थ्यांनी https://hmasnew.mahait.org/ या संकेतस्थळावर लॉगिन करून सन २०२६-२७ या वर्षासाठी आपले ऑनलाइन अर्ज दि. १५ सप्टेंबर २०२६ पर्यंत अद्ययावत करावेत, असे आवाहन सहायक आयुक्त, समाज कल्याण, जळगाव यांनी केले आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
