ग्रामपंचायत अधिकारी-कर्मचाऱ्यांच्या सुरक्षेसह कामाचा ताण, अतिरिक्त जबाबदाऱ्या आणि अनधिकृत चित्रिकरणासंदर्भातील मागण्यांसाठी जळगाव जिल्हाधिकारी कार्यालयावर मूक मोर्चा.
ग्रामपंचायत अधिकारी आणि कर्मचाऱ्यांच्या सुरक्षेसह विविध प्रलंबित मागण्यांकडे प्रशासनाचे लक्ष वेधण्यासाठी महाराष्ट्र राज्य ग्रामपंचायत अधिकारी युनियनच्या वतीने बुधवारी जिल्हाधिकारी कार्यालयावर मूक मोर्चा काढण्यात आला. जिल्हा परिषद कार्यालयापासून सुरू झालेल्या या मोर्चात जिल्ह्यातील विविध ग्रामपंचायतींचे अधिकारी आणि कर्मचारी मोठ्या संख्येने सहभागी झाले.
शिवरे येथील घटनेच्या पार्श्वभूमीवर आंदोलन
पारोळा तालुक्यातील शिवरे येथे ग्रामपंचायत अधिकाऱ्यावर झालेल्या हल्ल्याच्या घटनेच्या पार्श्वभूमीवर जिल्ह्यातील ग्रामपंचायत अधिकारी-कर्मचाऱ्यांमध्ये असंतोषाचे वातावरण निर्माण झाले आहे. कर्तव्य बजावताना अधिकारी आणि कर्मचाऱ्यांना सुरक्षित वातावरण उपलब्ध करून द्यावे, तसेच संबंधित घटनेतील दोषींवर कठोर कारवाई करावी, अशी मागणी यावेळी करण्यात आली.
फुले मार्केट, नेहरू पुतळा, कोर्ट चौकमार्गे मोर्चा
जिल्हा परिषद जळगाव येथून सुरू झालेला मूक मोर्चा फुले मार्केट, नेहरू पुतळा आणि कोर्ट चौक मार्गे जिल्हाधिकारी कार्यालयापर्यंत नेण्यात आला. अधिकारी-कर्मचाऱ्यांनी हातात विविध मागण्यांचे फलक घेत प्रशासनाचे लक्ष वेधले. घोषणाबाजी न करता शांततेच्या मार्गाने काढण्यात आलेल्या या मोर्चातून प्रलंबित मागण्यांकडे गांभीर्याने लक्ष देण्याचे आवाहन करण्यात आले.
अधिकारी-कर्मचाऱ्यांच्या सुरक्षेचा प्रश्न ऐरणीवर
ग्रामपंचायत अधिकारी आणि कर्मचाऱ्यांवरील वाढता कामाचा ताण तसेच सुरक्षेचा प्रश्न यावेळी अधोरेखित करण्यात आला. ग्रामसभा बैठकींची संख्या मर्यादित करावी, अधिकारी-कर्मचाऱ्यांचे अनधिकृत चित्रिकरण करून ते समाजमाध्यमांवर प्रसारित करण्यास प्रतिबंध करावा, तसेच बदनामीकारक मजकूर प्रसारित करण्यास आळा घालावा, अशा मागण्या करण्यात आल्या.
संवेदनशील ग्रामपंचायतींमध्ये पोलीस संरक्षणाची मागणी
संवेदनशील ग्रामपंचायतींमध्ये कर्तव्य बजावणाऱ्या अधिकारी-कर्मचाऱ्यांना आवश्यकतेनुसार पोलीस संरक्षण देण्यात यावे, अशी मागणीही संघटनेने केली. तसेच विविध शासकीय योजनांची अतिरिक्त जबाबदारी ग्रामपंचायत अधिकारी-कर्मचाऱ्यांवर न टाकता संबंधित विभागांकडे सोपवावी, अशी भूमिका मांडण्यात आली.
सुरक्षित आणि सन्मानजनक वातावरणाची अपेक्षा
ग्रामपंचायत स्तरावर कार्यरत अधिकारी आणि कर्मचाऱ्यांना कर्तव्य बजावताना सुरक्षित व सन्मानजनक वातावरण मिळणे आवश्यक आहे, अशी भूमिका संघटनेने मांडली. त्यांच्या सुरक्षेसह अन्य प्रलंबित मागण्यांवर प्रशासनाने तातडीने सकारात्मक निर्णय घ्यावा, अशी अपेक्षा मूक मोर्चाच्या माध्यमातून व्यक्त करण्यात आली.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
