महात्मा फुले विद्यालय, अहमदपूर येथे सायबर सुरक्षा जनजागृती सत्र; माजी विद्यार्थी नरेश पंडित यांच्या कार्याचा विद्यालयाकडून गौरव.
अहमदपूर : ज्या शाळेच्या अंगणात बालपणी शिक्षणाचे धडे गिरवले, त्याच विद्यालयात आज सायबर वॉरिअर म्हणून विद्यार्थ्यांना सायबर सुरक्षेचा संदेश देण्यासाठी परतण्याचा भावनिक आणि अभिमानाचा क्षण नरेश पंडित यांनी अनुभवला. महात्मा फुले माध्यमिक व उच्च माध्यमिक विद्यालय, अहमदपूर येथे आयोजित सायबर सुरक्षा जनजागृती सत्रादरम्यान विद्यालयाचे माजी विद्यार्थी आणि सायबर वॉरिअर नरेश पंडित यांचा विद्यालयाच्या वतीने विशेष सत्कार करण्यात आला.
सायबर जनजागृतीच्या क्षेत्रात नरेश पंडित करत असलेल्या कार्याची दखल घेत विद्यालयातील शिक्षकांनी त्यांना शाल व पुष्पहार देऊन सन्मानित केले. माजी विद्यार्थी म्हणून त्याच विद्यालयात पुन्हा येऊन विद्यार्थ्यांशी संवाद साधण्याची संधी मिळाल्याने हा क्षण त्यांच्या शैक्षणिक प्रवासातील विशेष आठवण ठरला.
या सत्रादरम्यान विद्यार्थ्यांना ऑनलाइन फसवणूक, संशयास्पद लिंक, ओटीपी सुरक्षितता, फोटो मॉर्फिंग, ए.आय.चा गैरवापर, सोशल मीडिया सुरक्षा, मजबूत पासवर्ड आणि वैयक्तिक माहितीचे संरक्षण याबाबत मार्गदर्शन करण्यात आले. डिजिटल माध्यमांचा वापर करताना कोणती खबरदारी घ्यावी आणि ऑनलाइन धोके टाळण्यासाठी कोणत्या बाबी लक्षात ठेवाव्यात, याची माहिती विद्यार्थ्यांना उदाहरणांसह देण्यात आली.
यावेळी आपल्या भावना व्यक्त करताना नरेश पंडित म्हणाले, “ज्या शाळेने घडवलं, त्याच शाळेत सायबर सुरक्षेचा संदेश देण्याची संधी मिळणे हा माझ्यासाठी अभिमानाचा आणि भावनिक क्षण आहे.”
विद्यालयातील शिक्षकांनी दिलेली कौतुकाची थाप आणि विद्यार्थ्यांकडून मिळालेला उत्स्फूर्त प्रतिसाद यामुळे सायबर जनजागृतीचे कार्य अधिक व्यापकपणे पुढे नेण्यासाठी प्रेरणा मिळाल्याचे नरेश पंडित यांनी सांगितले. माजी विद्यार्थी ते सायबर वॉरिअर आणि पुन्हा त्याच शाळेत मार्गदर्शक हा प्रवास विद्यार्थ्यांसाठीही प्रेरणादायी ठरला.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
