जळगाव नवीन बसस्थानकातील जबरी चोरीचा तपास करत पोलिसांनी आरोपीला भजी गल्ली परिसरातून ताब्यात घेतले. चोरीच्या रकमेपैकी १६ हजार रुपये हस्तगत.
जळगाव : नवीन बसस्थानक परिसरात हाताला झटका देत बळजबरीने २१ हजार रुपयांची रोकड हिसकावून पसार झालेल्या आरोपीला जिल्हापेठ पोलिसांनी अटक केली आहे. भिकन पंडीत शर्मा (वय ६०, रा. तलाव गल्ली, पारोळा) असे अटक केलेल्या आरोपीचे नाव असून, त्याच्याकडून १६ हजार रुपयांची रोकड हस्तगत करण्यात आल्याची माहिती पोलिसांनी दिली.
पोलिसांनी दिलेल्या माहितीनुसार, १७ सप्टेंबर रोजी सकाळी ११.४५ ते दुपारी १२ वाजेच्या सुमारास फिर्यादी नवीन बसस्थानक, जळगाव येथे उभे असताना एका अनोळखी व्यक्तीने त्यांच्या ताब्यातील २१ हजार रुपये हाताला झटका देऊन बळजबरीने हिसकावून घेतले आणि घटनास्थळावरून पसार झाला.
याप्रकरणी फिर्यादीने १९ सप्टेंबर रोजी जिल्हापेठ पोलिस ठाण्यात तक्रार दाखल केली. त्यानुसार गुन्हा रजिस्टर क्रमांक ३१५/२०२६ अन्वये भारतीय न्याय संहिता (बीएनएस), २०२३ मधील कलम ३०९ (४) अंतर्गत गुन्हा दाखल करण्यात आला.
सीसीटीव्ही फुटेजच्या आधारे तपास
गुन्ह्याचे गांभीर्य लक्षात घेऊन पोलिस अधीक्षक श्रीकांत धिवरे यांनी जिल्हापेठ पोलिस ठाण्याचे पोलिस निरीक्षक शरद शेवाळे यांना आरोपीचा शोध घेऊन चोरीस गेलेला मुद्देमाल हस्तगत करण्याच्या सूचना दिल्या. त्यानुसार पोलिस अधिकारी आणि अंमलदारांचे विशेष पथक तयार करण्यात आले.
तपास पथकाने घटनास्थळाची पाहणी करून परिसरातील सीसीटीव्ही फुटेजची तपासणी सुरू केली. त्याचबरोबर गोपनीय माहितीच्या आधारे संशयिताचा शोध घेण्यात येत होता. दरम्यान, संशयित व्यक्ती नवीन बसस्थानकाजवळील भजी गल्ली परिसरात फिरत असल्याची माहिती पोलिसांना मिळाली.
या माहितीच्या आधारे पोलिस पथकाने भजी गल्ली परिसरात सापळा रचून भिकन पंडीत शर्मा याला ताब्यात घेतले. चौकशीदरम्यान त्याने सुरुवातीला उडवाउडवीची उत्तरे दिल्याचे पोलिसांनी सांगितले. त्यानंतर कसून चौकशी केल्यानंतर त्याने गुन्ह्याची कबुली दिल्याचा दावा पोलिसांनी केला. त्याच्या ताब्यातून १६ हजार रुपयांची रोकड हस्तगत करण्यात आली.
आरोपीविरुद्ध यापूर्वीही गुन्हे
तपासादरम्यान भिकन पंडीत शर्मा याच्याविरुद्ध यापूर्वीही विविध पोलिस ठाण्यांमध्ये सहा गुन्हे दाखल असल्याची नोंद पोलिस अभिलेखातून समोर आल्याचे पोलिसांनी नमूद केले आहे.
यापैकी जिल्हापेठ पोलिस ठाण्यात २०११ मध्ये भादंवि कलम १७०, ४१९ आणि ४२० अन्वये गुन्हा दाखल असल्याची नोंद असल्याचे पोलिसांनी सांगितले.
पोलिस पथकाची कारवाई
ही कारवाई पोलिस अधीक्षक श्रीकांत धिवरे, अपर पोलिस अधीक्षक संदीप गावीत आणि उपविभागीय पोलिस अधिकारी नितीन गणापुरे यांच्या मार्गदर्शनाखाली तसेच पोलिस निरीक्षक शरद शेवाळे यांच्या नेतृत्वाखाली करण्यात आली.
कारवाईत सहाय्यक पोलिस निरीक्षक अनिल वाघ, पोलिस हेड कॉन्स्टेबल महेश महाजन, नरेश सोनवणे, तेजस मराठे, दीपक पाटील, प्रवीण जाधव, समाधान पाटील, प्रशांत लाड, कमलाकर बडगुजर आणि अजय आहिरे यांच्या पथकाचा सहभाग होता.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
