डिजिटल जगात सावधगिरीचे महत्त्व पटवून देण्यासाठी महाराष्ट्र फार्मसी कॉलेजमध्ये लाईव्ह हॅकिंग डेमो; विद्यार्थ्यांना सुरक्षित आणि जबाबदार डिजिटल वापराचा संदेश.
लातूर : विद्यार्थ्यांना वाढत्या सायबर गुन्ह्यांची आणि डिजिटल सुरक्षेची जाणीव करून देण्यासाठी महाराष्ट्र फार्मसी कॉलेजमध्ये Quick Heal Foundationच्या माध्यमातून विशेष लाईव्ह हॅकिंग डेमो व सायबर सुरक्षा जनजागृती सत्राचे आयोजन करण्यात आले. परमेश्वर पांढरे, हर्ष कोरडे आणि त्यांच्या टीमच्या मार्गदर्शनाखाली हे सत्र घेण्यात आले.
या सत्रादरम्यान विद्यार्थ्यांसमोर विविध सायबर धोक्यांचे प्रत्यक्ष लाईव्ह डेमो सादर करण्यात आले. इंटरनेट, सोशल मीडिया, ऑनलाइन गेमिंग आणि विविध डिजिटल प्लॅटफॉर्मचा वापर करताना निष्काळजीपणामुळे वैयक्तिक माहिती आणि डिजिटल सुरक्षेला कोणत्या प्रकारे धोका निर्माण होऊ शकतो, हे प्रात्यक्षिकाच्या माध्यमातून समजावून सांगण्यात आले.
लाईव्ह डेमोच्या माध्यमातून विद्यार्थ्यांना सायबर गुन्हे कोणत्या पद्धतीने घडू शकतात, याची प्रत्यक्ष जाणीव करून देण्यात आली. फिशिंग, बनावट लिंक, OTP फसवणूक, सोशल मीडिया अकाउंटशी संबंधित धोके, फोटो मॉर्फिंग, ऑनलाइन गेमिंग स्कॅम आणि वैयक्तिक माहितीचा गैरवापर यांसारख्या विषयांवर विद्यार्थ्यांना मार्गदर्शन करण्यात आले.
या प्रात्यक्षिकामुळे विद्यार्थ्यांमध्ये मोठे कुतूहल निर्माण झाले. डिजिटल जगात छोट्याशा निष्काळजीपणामुळेही मोठा धोका निर्माण होऊ शकतो, याची विद्यार्थ्यांना प्रत्यक्ष जाणीव झाली. त्यामुळे कोणतीही संशयास्पद लिंक उघडण्यापूर्वी, अनोळखी व्यक्तीशी संवाद साधण्यापूर्वी किंवा वैयक्तिक माहिती शेअर करण्यापूर्वी योग्य पडताळणी करण्याचा संदेश देण्यात आला.
Quick Heal Foundationच्या सायबर सुरक्षा जनजागृती उपक्रमातून विद्यार्थ्यांना आधुनिक सायबर धोक्यांची माहिती देत सुरक्षित आणि जबाबदार डिजिटल नागरिक घडवण्याचा प्रयत्न करण्यात आला. लाईव्ह हॅकिंग डेमोमुळे विद्यार्थ्यांना सायबर सुरक्षेचे महत्त्व केवळ ऐकून नव्हे, तर प्रत्यक्ष प्रात्यक्षिकाच्या माध्यमातून समजून घेता आले.
या उपक्रमातून “सतर्क रहा, सुरक्षित रहा आणि डिजिटल जगाचा जबाबदारीने वापर करा” हा महत्त्वपूर्ण संदेश महाराष्ट्र फार्मसी कॉलेजच्या विद्यार्थ्यांपर्यंत पोहोचवण्यात आला.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
