जळगावच्या ममुराबाद रस्त्यावरील प्रसिद्ध म्हाळसादेवी मंदिरात चोरी. खिडकीची जाळी कापून मंदिरात प्रवेश करत चोरट्याने दानपेटीतील रोकड व मौल्यवान वस्तू लंपास केल्या.
जळगाव शहरासह परिसरात चोरीच्या घटनांमध्ये वाढ होत असताना, शहरालगतच्या ममुराबाद रस्त्यावरील प्रसिद्ध म्हाळसादेवी मंदिरात अज्ञात चोरट्याने धाडसी चोरी केल्याची घटना उघडकीस आली आहे. चोरट्याने मंदिरात प्रवेश करून दानपेटी फोडत त्यातील रोकड व इतर मौल्यवान वस्तूंवर हात साफ केला. विशेष म्हणजे, हा संपूर्ण प्रकार मंदिरातील सीसीटीव्ही कॅमेऱ्यात कैद झाला आहे.
माहितीनुसार, ही घटना मध्यरात्रीच्या सुमारास घडली. अज्ञात चोरट्याने मंदिराच्या मागील बाजूने प्रवेश करत खिडकीची लोखंडी जाळी कापली. त्यानंतर खिडकीतून मंदिरात शिरून गाभाऱ्याजवळील दानपेटीपर्यंत पोहोचला. चोरट्याने दानपेटी फोडून त्यातील रोख रक्कम व अन्य मौल्यवान ऐवज चोरून नेला.
सकाळी मंदिर उघडल्यानंतर दानपेटी फोडल्याचे निदर्शनास आले. यानंतर मंदिर व्यवस्थापनाने सीसीटीव्ही फुटेजची पाहणी केली असता चोरीचा संपूर्ण प्रकार उघड झाला. फुटेजमध्ये संशयित व्यक्ती मंदिरात प्रवेश करताना तसेच दानपेटी फोडताना स्पष्टपणे दिसून येत असल्याची माहिती मिळाली आहे. त्यामुळे पोलिसांना तपासासाठी महत्त्वाचे धागेदोरे मिळण्याची शक्यता व्यक्त केली जात आहे.
घटनेची माहिती मिळताच जळगाव तालुका पोलिसांनी घटनास्थळी धाव घेतली. पोलिसांनी मंदिर परिसराची पाहणी करून पंचनामा केला तसेच सीसीटीव्ही फुटेज ताब्यात घेतले आहे. चोरट्याचा माग काढण्यासाठी श्वान पथकाचीही मदत घेण्यात आली.
याप्रकरणी अज्ञात व्यक्तीविरुद्ध गुन्हा दाखल करण्यात आला असून, संशयिताचा शोध सुरू आहे. दरम्यान, भरवस्तीत आणि भाविकांच्या श्रद्धास्थान असलेल्या मंदिरात झालेल्या या चोरीमुळे परिसरात संतापाची भावना व्यक्त होत आहे. आरोपीला लवकरात लवकर अटक करून चोरीचा उलगडा करावा, अशी मागणी भाविकांकडून करण्यात येत आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989
ईमेल – sthaniksamacharbharat@gmail.com
