जळगाव विद्यापीठाजवळ झालेल्या अपघातात नवविवाहितेचा मृत्यू, काका गंभीर जखमी. अपघातग्रस्त वाहनचालकाचा शोध घेण्यासाठी पोलिसांची तपास मोहीम सुरू.
शहरातील जळगाव विद्यापीठासमोरील रस्त्यावर सोमवारी घडलेल्या भीषण अपघातात लग्नानंतर अवघ्या सहा दिवसांनी एका २१ वर्षीय नवविवाहितेचा दुर्दैवी मृत्यू झाला. भरधाव चारचाकी वाहनाने दुचाकीला दिलेल्या जोरदार धडकेत नवविवाहितेचा मृत्यू झाला असून तिच्यासोबत असलेले काका गंभीर जखमी झाले आहेत. त्यांच्यावर शासकीय वैद्यकीय महाविद्यालय व रुग्णालयात उपचार सुरू आहेत.
मयत नवविवाहितेचे नाव वैशाली भाऊसाहेब पाटील (वय २१, रा. कोळपिंप्री, ता. अमळनेर) असे आहे. वैशाली हिचा विवाह ७ जुलै रोजी जळगाव शहरातील देवराम नगर (गुजरात पेट्रोल पंप परिसर) येथील पोलीस कर्मचारी विजय काशिनाथ पाटील यांच्याशी मोठ्या उत्साहात पार पडला होता. विवाहानंतर नवदांपत्य देवदर्शन करून काही दिवसांपूर्वीच घरी परतले होते.
सोमवारी वैशालीला माहेरी घेऊन जाण्यासाठी तिचे काका सासरी आले होते. दुपारी जेवण झाल्यानंतर वैशाली आणि तिचे काका दुचाकीवरून कोळपिंप्रीकडे निघाले होते. दुपारी सुमारे ४ वाजेच्या सुमारास ते जळगाव विद्यापीठासमोरील रस्त्यावरून जात असताना मागून आलेल्या भरधाव चारचाकी वाहनाने त्यांच्या दुचाकीला जोरदार धडक दिली.
धडक इतकी भीषण होती की दुचाकीवरील दोघेही रस्त्यावर फेकले गेले. या अपघातात वैशालीच्या डोक्याला गंभीर दुखापत झाली. अपघातानंतर परिसरातील नागरिकांनी तत्काळ मदत करत दोघांनाही जळगाव येथील शासकीय वैद्यकीय महाविद्यालय व रुग्णालयात दाखल केले.
मात्र, डॉक्टरांनी तपासणी केल्यानंतर वैशालीला मृत घोषित केले. तिच्यासोबत असलेले काका गंभीर जखमी असून त्यांच्यावर उपचार सुरू आहेत.
दरम्यान, अपघाताची माहिती मिळताच पोलिसांनी घटनास्थळी धाव घेत पंचनामा केला. अपघातास कारणीभूत ठरलेल्या चारचाकी वाहनाचा शोध घेण्यात येत असून या प्रकरणी पुढील तपास सुरू आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
