पत्नीच्या उपचारांचा आर्थिक ताण; ३० वर्षीय तरुणाचा दुर्दैवी मृत्यू ;मुलाच्या निधनानंतर वडिलांचा माणुसकीचा निर्णय; नेत्रदानातून दुसऱ्याच्या आयुष्यात प्रकाश देण्याचा संकल्प

अकोला जिल्ह्यातील वाडेगाव येथे ३० वर्षीय तरुणाचा दुर्दैवी मृत्यू. मुलाच्या निधनानंतर वडिलांनी नेत्रदानाचा निर्णय घेत गरजू व्यक्तीच्या आयुष्यात प्रकाश आणण्याचा संकल्प केला.

 येथील गजाननवाडी परिसरात शेतमजुरी करून कुटुंबाचा उदरनिर्वाह करणाऱ्या प्रतिक रमेश इंगळे (वय ३०) या तरुणाचा दुर्दैवी मृत्यू झाल्याची घटना समोर आली आहे. या घटनेमुळे इंगळे कुटुंबावर दुःखाचा डोंगर कोसळला असून, त्यांच्या अवघ्या तीन वर्षांच्या चिमुकल्याने पितृछत्र गमावले आहे.

मिळालेल्या माहितीनुसार, प्रतिक इंगळे यांच्या पत्नीला सुमारे सहा महिन्यांपूर्वी गंभीर आजाराचा त्रास झाला होता. त्यांच्यावर उपचार तसेच डोक्याची शस्त्रक्रिया करण्यात आली होती. पत्नीच्या उपचारांचा वाढता खर्च, कुटुंबाची हलाखीची आर्थिक परिस्थिती आणि शेतमजुरीवर अवलंबून असलेले मर्यादित उत्पन्न यामुळे कुटुंबावर मोठे आर्थिक संकट निर्माण झाले होते. या परिस्थितीमुळे प्रतिक यांच्यावर मानसिक ताण वाढल्याचे सांगण्यात येते.

या पार्श्वभूमीवर प्रतिक इंगळे यांनी टोकाचे पाऊल उचलल्याची दुर्दैवी घटना घडली. त्यांच्या पश्चात पत्नी, तीन वर्षांचा मुलगा, आई-वडील व इतर कुटुंबीय असा परिवार आहे.

दुःखाच्या प्रसंगात वडिलांचा माणुसकीचा निर्णय

मुलाच्या निधनाचे दुःख असतानाही प्रतिक यांच्या वडिलांनी अत्यंत माणुसकीचा आणि समाजासाठी प्रेरणादायी निर्णय घेतला. त्यांनी आपल्या मुलाचे नेत्रदान करण्याचा संकल्प केला.

“माझ्या मुलाच्या डोळ्यांमुळे एखाद्या गरजू व्यक्तीला दृष्टी मिळाली, तर माझ्या मुलाचे मरण सार्थक होईल,” अशी हृदयस्पर्शी भावना त्यांनी व्यक्त केली.

नेत्रदानाची प्रक्रिया पार पाडण्यासाठी डॉ. राखी राठोड, नेत्रदान समुपदेशक नंदन चोरपगार, जिल्हा सामान्य रुग्णालय, अकोला, तसेच रिजवाना मॅडम आणि डॉ. राठोड, ग्रामीण रुग्णालय, बाळापूर यांनी आवश्यक सहकार्य व मार्गदर्शन केले.

मुलाच्या डोळ्यांतून दुसऱ्याच्या आयुष्यात प्रकाश

एकुलता एक तरुण मुलगा गमावल्याचे दुःख असतानाही त्याच्या नेत्रदानाचा निर्णय घेणे ही बाब समाजासाठी निश्चितच प्रेरणादायी आहे. या निर्णयामुळे नेत्रदानाचे महत्त्व आणि अवयवदानाबाबतची सामाजिक जाणीव अधोरेखित झाली आहे.

“माझ्या मुलाच्या डोळ्यांनी दुसऱ्याला जग पाहता यावे. मुलाला गमावल्याचे दुःख कधीही भरून निघणार नाही. मात्र, माझ्या मुलाच्या डोळ्यांमुळे एखाद्या गरजू व्यक्तीला जग पाहता आले, तर माझ्या मुलाचे मरण सार्थकी लागल्याचे समाधान मिळेल,” अशी भावना प्रतिक यांच्या वडिलांनी व्यक्त केली.

आर्थिक संकटात मानसिक आधाराची गरज

या घटनेमुळे गंभीर आजारपण, वाढता उपचार खर्च आणि आर्थिक अडचणी यामुळे कुटुंबांवर निर्माण होणाऱ्या मानसिक ताणाचा प्रश्न पुन्हा एकदा ऐरणीवर आला आहे. आर्थिक किंवा कौटुंबिक संकटाच्या काळात संबंधित व्यक्तीला एकटेपणात न ठेवता कुटुंबीय, मित्रपरिवार आणि समाजाने मानसिक आधार देणे आवश्यक आहे.

अडचणीच्या काळात व्यक्तीनेही मनातील ताण एकट्याने सहन न करता विश्वासातील व्यक्तींशी संवाद साधावा आणि आवश्यक तेथे वैद्यकीय किंवा समुपदेशनाची मदत घ्यावी, हा या घटनेतून मिळणारा महत्त्वाचा सामाजिक संदेश आहे.