पिंप्राळा येथील योगिता सोनार खूनप्रकरणी अल्पवयीन मुलाची साक्ष ठरली महत्त्वाची; १७ साक्षीदारांच्या पुराव्यानंतर न्यायालयाने आरोपीला जन्मठेप व दंडाची शिक्षा ठोठावली.
मालमत्तेच्या कागदपत्रांवरून झालेला वाद भावजयीच्या हत्येपर्यंत पोहोचलेल्या प्रकरणाचा तब्बल चार वर्षांनंतर निकाल लागला आहे. पिंप्राळा परिसरातील मधुर कॉलनीत योगिता मुकेश सोनार यांच्या खूनप्रकरणी त्यांचा सख्खा दीर दिपक लोटन सोनार याला जळगाव जिल्हा न्यायालयाने जन्मठेपेची शिक्षा सुनावली असून, १० हजार रुपयांचा दंडही ठोठावला आहे.
न्यायालयीन कागदपत्रांनुसार, मालमत्तेच्या कागदपत्रांवरून दिपक सोनार आणि त्याची भावजय योगिता सोनार यांच्यात वाद सुरू होता. २१ मे २०२१ रोजी रात्री सुमारे सव्वानऊ वाजण्याच्या सुमारास हा वाद विकोपाला गेला. संतापलेल्या दिपकने योगिता यांच्या डोक्यात कुऱ्हाडीने वार केल्याचे तपासात निष्पन्न झाले. गंभीर जखमी झालेल्या योगिता यांचा मृत्यू झाला.
हल्ल्यानंतर आरोपीने कुऱ्हाड घटनास्थळी फेकून तेथून पळ काढल्याचे तपासात समोर आले होते.
अल्पवयीन मुलाची साक्ष महत्त्वाची
या खूनप्रकरणाच्या सुनावणीत मृत योगिता यांच्या अल्पवयीन मुलाची साक्ष महत्त्वाची ठरली. सरकार पक्षाने न्यायालयात एकूण १७ साक्षीदार तपासले. पंच साक्षीदार, वैद्यकीय अधिकारी, शासकीय दस्तऐवज परीक्षक तसेच तपासी अधिकारी पोलीस निरीक्षक अनिल बडगुजर यांच्या साक्षी आणि पुरावे खटल्यात निर्णायक ठरले.
सरकारी वकील सुरेंद्र काबरा यांनी सादर केलेले साक्षी-पुरावे आणि केलेला प्रभावी युक्तिवाद न्यायालयाने ग्राह्य धरला. त्यानुसार जिल्हा न्यायाधीश-२ ए. एस. खडसे यांच्या न्यायालयाने दिपक लोटन सोनार याला खुनाच्या गुन्ह्यात दोषी ठरवले. न्यायालयाने आरोपीला जन्मठेप आणि १० हजार रुपये दंड अशी शिक्षा सुनावली.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989
ईमेल – sthaniksamacharbharat@gmail.com
