एमआयडीसी परिसरातील उद्योगांमध्ये स्थानिक तरुणांना रोजगार देण्याची मागणी करत वंचित बहुजन आघाडीचा जिल्हाधिकारी कार्यालयावर मोर्चा; मागण्या न मानल्यास तीव्र आंदोलनाचा इशारा.
स्थानिक तरुणांना जिल्ह्यातील औद्योगिक वसाहतींमध्ये रोजगाराच्या संधी उपलब्ध करून द्याव्यात, या प्रमुख मागणीसाठी वंचित बहुजन आघाडीच्या वतीने जिल्हाधिकारी कार्यालयावर धडक मोर्चा काढण्यात आला. जिल्हाध्यक्ष शमीभा पाटील यांच्या नेतृत्वाखाली काढण्यात आलेल्या या मोर्चादरम्यान कार्यकर्त्यांनी शासनाच्या विरोधात जोरदार घोषणाबाजी करत तीव्र निदर्शने केली.
मोर्चानंतर भरपावसात जिल्हाधिकारी कार्यालयासमोर रस्त्यावर बसून वंचित बहुजन आघाडीच्या कार्यकर्त्यांनी ठिय्या आंदोलन केले. जिल्ह्यातील विविध तालुक्यांमधील एमआयडीसी परिसरात स्थानिक तरुणांना रोजगार देण्याच्या प्रश्नाकडे प्रशासन आणि स्थानिक लोकप्रतिनिधी दुर्लक्ष करत असल्याचा गंभीर आरोप यावेळी करण्यात आला.
स्थानिकांना रोजगार देण्याची मागणी
जिल्ह्यातील औद्योगिक वसाहतींमध्ये विविध कंपन्या आणि उद्योग कार्यरत आहेत. मात्र, स्थानिक तरुणांना त्यांच्या पात्रतेनुसार रोजगाराच्या संधी मिळत नसल्याने त्यांच्यामध्ये नाराजी आहे. स्थानिक तरुणांना प्राधान्याने रोजगार उपलब्ध करून देण्यासाठी प्रशासनाने ठोस धोरण राबवावे, अशी मागणी वंचित बहुजन आघाडीने केली.
औद्योगिक विकासाच्या नावाखाली स्थानिकांच्या जमिनी आणि संसाधनांचा वापर होत असताना रोजगाराच्या बाबतीत मात्र स्थानिक तरुणांकडे दुर्लक्ष केले जात असल्याचा आरोप आंदोलकांनी केला.
पंधरा दिवसांचा अल्टिमेटम
स्थानिक तरुणांच्या रोजगाराचा प्रश्न तातडीने मार्गी लावावा, अन्यथा आंदोलन अधिक तीव्र करण्याचा इशारा वंचित बहुजन आघाडीच्या वतीने देण्यात आला. येत्या १५ दिवसांत मागण्या मान्य करून ठोस कार्यवाही न झाल्यास शासनाच्या विरोधात तीव्र आंदोलन छेडण्यात येईल, असा इशारा जिल्हाध्यक्ष शमीभा पाटील यांनी दिला.
भरपावसातही कार्यकर्त्यांनी आंदोलन सुरू ठेवत प्रशासनाचे लक्ष वेधले. यावेळी शासनाच्या विरोधात जोरदार घोषणाबाजी करण्यात आली.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
