महात्मा फुले विद्यालयात सायबर सुरक्षा जनजागृती; विद्यार्थ्यांचा प्रश्नोत्तरांत उत्स्फूर्त सहभाग आणि सायबर सुरक्षा माहितीपत्रकांचे वाटप.
डिजिटल तंत्रज्ञानाचा वाढता वापर आणि त्यासोबत निर्माण होणारे सायबर गुन्ह्यांचे धोके लक्षात घेता विद्यार्थ्यांमध्ये सायबर सुरक्षेबाबत जागरूकता निर्माण करणे आवश्यक झाले आहे. याच उद्देशाने राजर्षी शाहू महाविद्यालय, लातूर आणि क्विक हील फाउंडेशन, पुणे यांच्या संयुक्त विद्यमाने लातूर जिल्ह्यात राबविण्यात येत असलेल्या ‘सायबर शिक्षा फॉर सायबर सुरक्षा’ या जनजागृती उपक्रमांतर्गत महात्मा फुले माध्यमिक व उच्च माध्यमिक विद्यालय, अहमदपूर येथे सायबर सुरक्षा जनजागृती सत्राचे आयोजन करण्यात आले.
दि. ११ ऑगस्ट २०२६ रोजी सकाळी ८ ते ९.१५ या वेळेत झालेल्या या सत्रात इयत्ता ५ वी ते १० वीमधील तब्बल २२०० विद्यार्थ्यांनी सहभाग घेतला. विद्यार्थ्यांची मोठी उपस्थिती हे या उपक्रमाचे विशेष आकर्षण ठरले.
विविध सायबर धोक्यांबाबत विद्यार्थ्यांना मार्गदर्शन
या सत्रात सायबर वॉरिअर नरेश पंडित यांच्यासह अविष्कार कांबळे, श्रेयश माकणे आणि आयुष जोशी यांनी विद्यार्थ्यांशी संवाद साधला. डिजिटल जगात वावरताना कोणती काळजी घ्यावी, याबाबत विद्यार्थ्यांना विविध उदाहरणांच्या माध्यमातून मार्गदर्शन करण्यात आले.
यावेळी ऑनलाइन फसवणूक, फिशिंग व संशयास्पद लिंक, फोटो मॉर्फिंग, कृत्रिम बुद्धिमत्तेचा (AI) गैरवापर, ऑनलाइन गेम्सचे दुष्परिणाम, मजबूत पासवर्ड, OTP व वैयक्तिक माहितीची सुरक्षितता, सोशल मीडियाचा सुरक्षित वापर तसेच मोबाईल ॲप्सना परवानगी देताना घ्यावयाची खबरदारी या विषयांवर सविस्तर माहिती देण्यात आली.
सुरक्षित डिजिटल सवयी अंगीकारण्याचे आवाहन
सायबर गुन्ह्यांपासून सुरक्षित राहण्यासाठी अनोळखी किंवा संशयास्पद लिंकवर क्लिक न करणे, OTP व पासवर्ड कोणालाही न सांगणे, सोशल मीडियावर वैयक्तिक माहिती शेअर करताना सावधगिरी बाळगणे आणि कोणतेही ॲप डाउनलोड करताना केवळ आवश्यक परवानग्याच देणे, याबाबत विद्यार्थ्यांना मार्गदर्शन करण्यात आले.
ऑनलाइन फसवणूक झाल्यास वेळ न दवडता राष्ट्रीय सायबर हेल्पलाईन क्रमांक १९३० वर संपर्क साधून तक्रार नोंदविण्याचे आवाहनही करण्यात आले.
प्रश्नोत्तरातून विद्यार्थ्यांच्या शंकांचे निरसन
सत्राच्या शेवटी विद्यार्थ्यांसोबत प्रश्नोत्तरांचा संवाद घेण्यात आला. विद्यार्थ्यांनी सायबर सुरक्षेशी संबंधित विविध प्रश्न विचारत आपल्या शंकांचे निरसन करून घेतले. संवादात्मक पद्धतीमुळे विद्यार्थ्यांचा सत्रातील सहभाग अधिक वाढला.
कार्यक्रमाच्या शेवटी विद्यार्थ्यांना सायबर सुरक्षा विषयक माहितीपत्रके वितरित करण्यात आली. त्यामुळे सत्रादरम्यान मिळालेली माहिती विद्यार्थ्यांना पुढील काळातही संदर्भासाठी उपलब्ध राहणार आहे.
शिक्षकांच्या सहकार्याने उपक्रम यशस्वी
कार्यक्रमास विद्यालयाचे मुख्याध्यापक जाधव एस. आर. यांचे मार्गदर्शन लाभले. तसेच मुसळे एन. आर., माने सर आणि देशमुख एस. एच. यांनी कार्यक्रमासाठी विशेष सहकार्य केले. विद्यालयातील शिक्षकवृंदाच्या सहकार्यामुळे सायबर सुरक्षेचा संदेश मोठ्या संख्येने विद्यार्थ्यांपर्यंत प्रभावीपणे पोहोचविण्यात आला.
२२०० विद्यार्थ्यांचा सहभाग असलेले हे जनजागृती सत्र सुरक्षित आणि जबाबदार डिजिटल वापराबाबत विद्यार्थ्यांमध्ये जागरूकता निर्माण करणारे ठरले.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
