विद्यार्थ्यांमध्ये सायबर जागरूकता वाढवण्यासाठी प्रत्यक्ष उदाहरणे, केस स्टडी आणि लाईव्ह डेमोच्या माध्यमातून डिजिटल सुरक्षिततेचे महत्त्व समजावून सांगण्याचा उपक्रम.
लातूर : वाढत्या ऑनलाइन सायबर गुन्ह्यांच्या पार्श्वभूमीवर लातूरचे जिल्हाधिकारी डॉ. भारत बास्टेवाड (IAS) यांच्यासोबत परमेश्वर पांढरे व त्यांच्या टीमने सायबर सुरक्षा आणि डिजिटल सुरक्षिततेबाबत महत्त्वपूर्ण संवाद साधला. यावेळी टीमच्या वतीने लाईव्ह हॅकिंग डेमो सादर करून डिजिटल जगात वापरकर्त्यांची फसवणूक कोणत्या पद्धतीने होऊ शकते, याचे प्रात्यक्षिक दाखवण्यात आले.
विशेषतः ऑनलाइन गेमिंगच्या माध्यमातून होणाऱ्या सायबर फसवणुकीचे वाढते प्रकार, बनावट लिंक, फिशिंग, वैयक्तिक माहितीची चोरी तसेच गेमिंगदरम्यान अनोळखी व्यक्तींशी होणारा संपर्क यांसारख्या धोक्यांवर यावेळी चर्चा करण्यात आली. ऑनलाइन गेमिंगचा वापर वाढत असताना त्याचा गैरफायदा घेऊन सायबर गुन्हेगारांकडून नागरिक आणि विद्यार्थ्यांना विविध प्रकारे लक्ष्य केले जाऊ शकते, याकडे लक्ष वेधण्यात आले.
लाईव्ह डेमोच्या माध्यमातून सायबर हल्ल्यांची कार्यपद्धती समजावून सांगताना विद्यार्थी आणि नागरिकांनी डिजिटल प्लॅटफॉर्मचा वापर करताना कोणती काळजी घ्यावी, यावरही चर्चा झाली. जिल्हाधिकारी डॉ. भारत बास्टेवाड यांनी या उपक्रमाची माहिती जाणून घेत टीमसोबत सायबर सुरक्षेच्या विविध पैलूंवर विचारांची देवाणघेवाण केली.
या संवादातून मिळालेली माहिती, अनुभव आणि महत्त्वाचे मुद्दे आगामी सायबर सुरक्षा जनजागृती सत्रांमध्ये विद्यार्थ्यांपर्यंत पोहोचवण्याचा निर्णय घेण्यात आला. परमेश्वर पांढरे व टीमकडून विविध शाळा-महाविद्यालयांमध्ये प्रत्यक्ष उदाहरणे, केस स्टडी आणि लाईव्ह डेमोच्या माध्यमातून विद्यार्थ्यांना सायबर सुरक्षेचे महत्त्व समजावून सांगण्यात येणार आहे.
“सायबर सुरक्षा ही केवळ तांत्रिक बाब नसून प्रत्येक विद्यार्थी आणि नागरिकाची जबाबदारी आहे,” हा संदेश या उपक्रमातून प्रभावीपणे पोहोचवण्याचा प्रयत्न केला जाणार आहे. सुरक्षित आणि जबाबदार डिजिटल समाज निर्माण करण्यासाठी सायबर सुरक्षा जनजागृतीचा हा उपक्रम पुढेही सुरू ठेवण्यात येणार आहे.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
