नवरात्रोत्सवात सोशल मीडियावरील गरबा जोडीदाराच्या जाहिरातींमधून महिलांची फसवणूक किंवा खासगी माहितीचा गैरवापर होण्याची शक्यता; चौकशीची मागणी.
भाईंदर : नवरात्रोत्सवाच्या पार्श्वभूमीवर समाजमाध्यमांवर ‘भाड्याने गरबा जोडीदार’ या नावाने प्रसारित होत असलेल्या जाहिरातींची चौकशी करून संबंधितांवर कायदेशीर कारवाई करावी, अशी मागणी आमदार नरेंद्र मेहता यांनी केली आहे. यासंदर्भात त्यांनी पोलीस आयुक्त निकेत कौशिक यांची भेट घेऊन निवेदन साद केले.
मिरा-भाईंदरसह मुंबई उपनगर आणि ठाणे परिसरात नवरात्रोत्सवानिमित्त मोठ्या प्रमाणावर दांडिया आणि गरबा कार्यक्रमांचे आयोजन केले जाते. या पार्श्वभूमीवर समाजमाध्यमांवर ‘भाड्याने गरबा जोडीदार’ उपलब्ध करून देण्याच्या जाहिराती प्रसारित होत असल्याचे निदर्शनास आल्याचे मेहता यांनी निवेदनात नमूद केले आहे.
१ हजार ते ६ हजार ५०० रुपयांपर्यंत दराचा दावा
मेहता यांनी दिलेल्या निवेदनानुसार, संबंधित जाहिरातींमध्ये महिला, पुरुष, तरुण आणि तरुणींना १ हजार ते ६ हजार ५०० रुपयांपर्यंतच्या दरात गरबा जोडीदार उपलब्ध करून देण्याचा दावा करण्यात येत आहे.
या जाहिरातींच्या माध्यमातून विशेषतः महिला आणि तरुणींची फसवणूक होण्याची तसेच त्यांच्याकडून घेतलेल्या वैयक्तिक आणि खासगी माहितीचा गैरवापर होण्याची शक्यता असल्याची चिंता मेहता यांनी व्यक्त केली आहे.
संकेतस्थळे आणि मोबाइल अॅपची चौकशी करण्याची मागणी
‘भाड्याने गरबा जोडीदार’ अशा स्वरूपाच्या जाहिराती प्रसारित करणाऱ्या संकेतस्थळांचे आणि मोबाइल अॅप्लिकेशनच्या मालकांची तसेच संबंधित जाहिरातदारांची चौकशी करण्यात यावी, अशी मागणी मेहता यांनी पोलीस आयुक्तांकडे केली आहे.
या जाहिरातींच्या माध्यमातून फसवणूक, वैयक्तिक माहितीचा गैरवापर किंवा अन्य कोणताही गैरप्रकार होत असल्याचे तपासात आढळल्यास संबंधितांवर कायदेशीर कारवाई करावी, अशी मागणीही त्यांनी केली.
नवरात्रोत्सवाच्या काळात समाजमाध्यमांवर अशा प्रकारच्या जाहिरातींचा प्रसार वाढू शकतो. त्यामुळे संबंधित जाहिरातींची सत्यता तपासून नागरिकांच्या सुरक्षिततेच्या दृष्टीने आवश्यक ती कार्यवाही करावी, अशी मागणी निवेदनाद्वारे करण्यात आली आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
