मुक्ताईनगर तालुक्यातील नागरिकांसाठी विशेष शासकीय सेवा शिबिर. ३१ जुलै रोजी विविध सरकारी योजनांचा लाभ एकाच ठिकाणी मिळणार.
महाराष्ट्र शासनाच्या ‘महाराजस्व अभियान’ अंतर्गत मुक्ताईनगर तालुक्यातील नागरिकांना विविध शासकीय सेवा एकाच ठिकाणी उपलब्ध करून देण्यासाठी शुक्रवार, दि. ३१ जुलै २०२६ रोजी सकाळी १० ते सायंकाळी ५ वाजेपर्यंत विशेष बहुविभागीय शिबिराचे आयोजन करण्यात आले आहे. हे शिबिर जयस्वाल लॉन्स, सालबर्डी रोड, मुक्ताईनगर येथे आयोजित करण्यात आले असून, तालुक्यातील नागरिकांनी आवश्यक कागदपत्रांसह उपस्थित राहून विविध योजनांचा लाभ घ्यावा, असे आवाहन करण्यात आले आहे.
या अभियानाला आमदार श्री. चंद्रकांत (राजू) पाटील यांची प्रमुख उपस्थिती लाभणार असून, महसूल, कृषी, आरोग्य, पंचायत समिती, वन विभाग, समाजकल्याण, महिला व बालविकास तसेच इतर विविध शासकीय विभागांचे अधिकारी आणि कर्मचारी नागरिकांच्या सेवेसाठी दिवसभर उपलब्ध राहणार आहेत.
एकाच ठिकाणी मिळणार विविध शासकीय सेवा
या विशेष शिबिरामध्ये महसूल विभागामार्फत ७/१२, ८-अ उतारे, फेरफार, नाव नोंदणी, शेतकरी दर्जा प्रमाणपत्र, जात, रहिवासी व उत्पन्न दाखले, गावठाण जमीन व अतिक्रमण नियमितीकरण आदी कामांचा निपटारा केला जाणार आहे.
कृषी विभागामार्फत पीएम किसान योजना नोंदणी, नमो शेतकरी योजना, पीक विमा, कृषी अनुदान माहिती, माती परीक्षण कार्ड यांसारख्या सेवा उपलब्ध राहतील.
आरोग्य विभागाच्या माध्यमातून आयुष्मान भारत कार्ड, महात्मा फुले जनआरोग्य योजना कार्ड, मोफत आरोग्य तपासणी यांचा लाभ नागरिकांना मिळणार आहे.
महिला व बालविकास विभागामार्फत लाडकी बहीण योजना, संजय गांधी निराधार योजना, अंगणवाडी नोंदणी याबाबत मार्गदर्शन व सेवा दिली जाणार आहे.
समाजकल्याण विभागाकडून जात पडताळणी, एससी/एसटी/ओबीसी दाखले, अपंग व वृद्ध पेन्शन योजनांबाबत आवश्यक सेवा व माहिती उपलब्ध करून दिली जाणार आहे.
याशिवाय बँकिंग सेवा, किसान क्रेडिट कार्ड, वीज विभागाच्या नवीन मीटर व नाव बदलासंदर्भातील सेवा, तसेच रेशन कार्डसंबंधित कामे देखील संबंधित विभागांमार्फत करण्यात येणार आहेत.
नागरिकांसाठी मोठी सुविधा
या अभियानामुळे विविध शासकीय कार्यालयांमध्ये वारंवार फेऱ्या मारण्याची गरज कमी होणार असून, अनेक सेवा एकाच ठिकाणी आणि एकाच दिवशी उपलब्ध होणार आहेत. त्यामुळे वेळ, श्रम आणि खर्चाची बचत होऊन नागरिकांना प्रशासनाशी थेट संवाद साधण्याची संधी मिळणार आहे.
आयोजकांनी मुक्ताईनगर तालुक्यातील सर्व नागरिकांना आवश्यक कागदपत्रांसह शिबिरात उपस्थित राहून उपलब्ध शासकीय योजनांचा लाभ घेण्याचे आवाहन केले आहे.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
