३५ व्या दीक्षांत समारंभासाठी अर्ज प्रक्रिया, शुल्क, आवश्यक कागदपत्रे, पात्रता व महत्त्वाच्या सूचना जाहीर; विद्यार्थ्यांनी वेळेत ऑनलाइन अर्ज करण्याचे विद्यापीठाचे आवाहन.
कवयित्री बहिणाबाई चौधरी उत्तर महाराष्ट्र विद्यापीठ (कबचौउमवि), जळगाव यांच्यातर्फे आयोजित करण्यात येणाऱ्या ३५ व्या दीक्षांत समारंभासाठी पदवी, पदविका आणि विद्यावाचस्पती (Ph.D.) पदवीधारक विद्यार्थ्यांकडून ऑनलाइन अर्ज मागविण्यात आले आहेत. यासंदर्भातील अधिकृत अधिसूचना विद्यापीठाच्या परीक्षा व मूल्यमापन मंडळाने प्रसिद्ध केली असून, पात्र विद्यार्थ्यांनी निश्चित मुदतीत ऑनलाइन अर्ज करून पदवी प्रमाणपत्र मिळवावे, असे आवाहन करण्यात आले आहे.
विद्यापीठाने जाहीर केलेल्या माहितीनुसार डिसेंबर २०२५, एप्रिल/मे/जून २०२६ किंवा त्यापूर्वी झालेल्या परीक्षांमध्ये उत्तीर्ण झालेले विद्यार्थी, तसेच ज्यांची विद्यावाचस्पती (Ph.D.) पदवी जाहीर झाली आहे, ते या दीक्षांत समारंभासाठी अर्ज करण्यास पात्र आहेत. मात्र, प्रवेशाच्या वेळी किंवा परीक्षा अर्जासोबत पदवी प्रमाणपत्राचे शुल्क आधीच भरलेल्या विद्यार्थ्यांना पुन्हा अर्ज करण्याची आवश्यकता नसल्याचे स्पष्ट करण्यात आले आहे.
३ ऑगस्ट २०२६ ते १५ ऑक्टोबर २०२६ या कालावधीत विद्यार्थ्यांना कोणत्याही विलंब शुल्काशिवाय ऑनलाइन अर्ज करता येणार आहे. तर १६ ऑक्टोबर ते १५ नोव्हेंबर २०२६ या कालावधीत रु. १०० विलंब शुल्कासह अर्ज स्वीकारले जाणार आहेत.
शुल्काबाबतही विद्यापीठाने स्पष्ट सूचना दिल्या आहेत. उत्तीर्ण झाल्यानंतर पाच वर्षांच्या आत अर्ज करणाऱ्या विद्यार्थ्यांसाठी शुल्क रु. ५५०, तर पाच वर्षांहून अधिक कालावधी झालेल्या विद्यार्थ्यांसाठी रु. १,४३० निश्चित करण्यात आले आहे. हे शुल्क क्रेडिट कार्ड, डेबिट कार्ड, नेट बँकिंग किंवा यूपीआय (UPI) द्वारे ऑनलाइन भरावे लागणार आहे.
ऑनलाइन अर्ज करण्यासाठी विद्यार्थ्यांनी विद्यापीठाच्या अधिकृत संकेतस्थळ www.nmu.ac.in वर जाऊन Student Corner → Convocation → 35th Convocation Ceremony या पर्यायाद्वारे अर्ज भरावा. प्रथम नोंदणी (Registration) करून प्राप्त होणारा User ID आणि Password सुरक्षित ठेवणे आवश्यक आहे. त्यानंतर PRN (Permanent Registration Number) नोंदवून शैक्षणिक माहितीची पडताळणी करावी.
अर्जासोबत अलिकडील रंगीत पासपोर्ट आकाराचा फोटो, स्वाक्षरी (JPEG स्वरूपात), अंतिम वर्षाचे मूळ गुणपत्रक (नेट प्रिंट ग्राह्य नाही) आणि आधार कार्ड (PDF स्वरूपात) अपलोड करणे बंधनकारक आहे. तसेच आधार क्रमांक व लिंगाची माहिती अचूक नमूद करण्याच्या सूचनाही देण्यात आल्या आहेत.
विद्यापीठाने काही महत्त्वाच्या सूचना देखील प्रसिद्ध केल्या आहेत. एप्रिल/मे २०२४ पूर्वी प्रवेश घेतलेल्या आणि डिसेंबर २०२५ किंवा एप्रिल/मे २०२६ मध्ये पुनर्परीक्षेद्वारे उत्तीर्ण झालेल्या विद्यार्थ्यांना शुल्क भरून अर्ज करावा लागेल. तसेच अर्ज करण्यापूर्वी विद्यार्थ्यांनी विद्यापीठाच्या संकेतस्थळावरील Undelivered Certificate यादीत आपले नाव नाही याची खात्री करून घ्यावी. ज्यांचे पदवी प्रमाणपत्र हरवले आहे, त्यांनी दीक्षांत समारंभासाठी अर्ज न भरता Duplicate Degree Certificate साठी स्वतंत्र अर्ज करावा.
स्वायत्त (Autonomous) महाविद्यालयांतील विद्यार्थ्यांनी आपले अर्ज संबंधित महाविद्यालयामार्फत सादर करावेत, असेही विद्यापीठाने स्पष्ट केले आहे. नोकरी, पुढील शिक्षण किंवा परदेशगमनासाठी तातडीने पदवी प्रमाणपत्र आवश्यक असल्यास Urgent Degree Certificate साठी स्वतंत्र अर्ज करण्याची सुविधाही उपलब्ध करून देण्यात आली असून त्यासाठी स्वतंत्र शुल्क आकारले जाणार आहे.
ऑनलाइन शुल्क भरताना काही तांत्रिक अडचण येऊन खात्यातून रक्कम वजा झाली आणि पावती तयार झाली नाही, तर विद्यार्थ्यांनी २४ तास प्रतीक्षा करावी किंवा विद्यापीठाच्या वित्त विभागाशी संपर्क साधावा. तसेच अर्जामध्ये काही त्रुटी किंवा अपूर्णता आढळल्यास अर्ज भरल्यापासून सात दिवसांच्या आत convocation@nmu.ac.in या ई-मेलवर संपर्क साधण्याचे आवाहन करण्यात आले आहे.
विद्यार्थ्यांनी अंतिम तारखेची वाट न पाहता वेळेत ऑनलाइन अर्ज करून आवश्यक कागदपत्रे अपलोड करावीत आणि विद्यापीठाने दिलेल्या सर्व सूचनांचे काटेकोर पालन करावे, असे आवाहन परीक्षा व मूल्यमापन मंडळाच्या संचालकांनी केले आहे.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
