अकोला केशवनगर अपघातप्रकरणी सोनू उर्फ प्रविण चंद्रकांत वाटमारे यांच्याविरुद्ध बीएनएस व मोटार वाहन अधिनियमांतर्गत गुन्हा दाखल. जखमीवर शस्त्रक्रिया करण्यात आली.
केशवनगर परिसरात भरधाव वेगाने आलेल्या थार वाहनाने दुचाकीला जोरदार धडक दिल्याने सेंट्रिंग कामगार गंभीर जखमी झाल्याची घटना ५ सप्टेंबर रोजी सकाळच्या सुमारास घडली. या अपघातात राहुल मधुकर कांबळे (वय ४९) यांच्या डाव्या पायाला गंभीर दुखापत होऊन हाड मोडले. त्यांच्यावर खासगी रुग्णालयात उपचार करण्यात आले असून, ७ सप्टेंबर रोजी त्यांच्या डाव्या पायावर शस्त्रक्रिया करण्यात आली. या प्रकरणी खदान पोलिसांनी युवासेना (उद्धव बाळासाहेब ठाकरे) गटाचे महाराष्ट्र सहसचिव असल्याचे सांगितले जाणारे सोनू उर्फ प्रविण चंद्रकांत वाटमारे यांच्याविरुद्ध गुन्हा दाखल केला आहे.
पोलिसांत दाखल करण्यात आलेल्या तक्रारीनुसार, राहुल कांबळे हे ५ सप्टेंबर रोजी सकाळी सेंट्रिंगच्या कामासाठी केशवनगर परिसरात गेले होते. सकाळी सुमारे ९ ते १० वाजण्याच्या दरम्यान ते आपल्या एका सहकाऱ्यासोबत प्लॅटिना दुचाकीवरून चहा घेण्यासाठी जात होते. केशवनगर मार्ग क्रमांक ६ वरील चौकातून ते जात असताना एमएच ३० बीडब्ल्यू ७४१८ क्रमांकाच्या थार वाहनाने त्यांच्या दुचाकीला जोरदार धडक दिल्याचे तक्रारीत नमूद करण्यात आले आहे.
धडक इतकी जोरदार होती की, दुचाकीवरील राहुल कांबळे हे रस्त्यावर खाली पडले, तर त्यांच्यासोबत असलेला सहकारीही वाहनापासून दूर फेकला गेला. या अपघातात दोघांनाही दुखापत झाली. कांबळे यांच्या डाव्या पायाला गंभीर दुखापत होऊन हाड मोडल्याने त्यांना उपचारासाठी खासगी रुग्णालयात दाखल करण्यात आले. उपचारादरम्यान त्यांच्या पायावर ७ सप्टेंबर रोजी शस्त्रक्रिया करण्यात आली. अपघातामुळे त्यांच्यावर उपचाराचा खर्च तसेच दुचाकीच्या नुकसानीचा आर्थिक भारही पडल्याचे तक्रारीतून समोर आले आहे.
उपचाराचा खर्च देण्याचे आश्वासन; तक्रार न करण्याची विनंती केल्याचा आरोप
अपघातानंतर थार चालक सोनू उर्फ प्रविण चंद्रकांत वाटमारे यांनी जखमी राहुल कांबळे यांच्या उपचाराचा खर्च तसेच दुचाकीच्या नुकसानीचा खर्च देण्याचे आश्वासन दिल्याचा आरोप तक्रारीत करण्यात आला आहे. तसेच या आश्वासनाच्या आधारे पोलिसांत तक्रार दाखल करू नये, अशी विनंती करण्यात आल्याचेही तक्रारीत नमूद आहे. त्यामुळे कांबळे यांनी सुरुवातीला पोलिसांत तक्रार दाखल केली नसल्याचे सांगण्यात आले.
मात्र, उपचार सुरू झाल्यानंतर संबंधितांकडून खर्च देण्याबाबत टाळाटाळ करण्यात आली आणि अद्याप उपचाराचा किंवा वाहनाच्या नुकसानीचा कोणताही खर्च देण्यात आलेला नसल्याचा दावा तक्रारदाराने केला आहे. त्यानंतर अखेर या प्रकरणी खदान पोलिसांत तक्रार दाखल करण्यात आली.
या तक्रारीच्या आधारे खदान पोलिसांनी सोनू उर्फ प्रविण चंद्रकांत वाटमारे यांच्याविरुद्ध मोटार वाहन अधिनियम १९८८ मधील कलम १८४ तसेच भारतीय न्याय संहिता (बीएनएस) २०२३ मधील कलम १२५(अ), १२५(ब) आणि २८१ अन्वये गुन्हा दाखल केला आहे. या कलमांनुसार भरधाव किंवा निष्काळजीपणे वाहन चालविणे तसेच अपघातात दुखापत होण्यासंदर्भातील तरतुदींचा समावेश आहे. या प्रकरणाचा पुढील तपास खदान पोलिसांकडून सुरू आहे.
सुनीता खिल्लारे ह्या स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून त्या विविध विषयांवर सखोल आणि प्रभावी बातम्या प्रकाशित करतात.
ईमेल -sunitaradhe2228@gmail.com
मो. क्र. 9321950783
