वामनराव चटप, डॉ. प्रशांत विघे यांच्यासह विविध शिक्षक नेत्यांनी शिक्षण क्षेत्रातील प्रश्नांसाठी संघटित प्रयत्न आणि व्यापक शैक्षणिक हिताची गरज व्यक्त केली.
शिक्षण क्षेत्रासमोरील बदलते आव्हान, शिक्षकांच्या प्रलंबित मागण्या आणि शैक्षणिक संस्थांच्या विविध प्रश्नांच्या पार्श्वभूमीवर शिक्षकांचे प्रभावी प्रतिनिधित्व आवश्यक आहे. विधानपरिषद हे वरिष्ठ सभागृह असून शिक्षक व पदवीधर मतदारसंघांच्या माध्यमातून संबंधित घटकांना विधिमंडळात आपला आवाज मांडण्याची संधी मिळते. या प्रतिनिधित्वाचा प्रभावी वापर करण्यासाठी शिक्षकांनी एकत्रित येऊन व्यापक शैक्षणिक हितासाठी पुढाकार घ्यावा, असे आवाहन माजी आमदार वामनराव चटप यांनी केले.
अमरावती येथील भारतीय महाविद्यालयात प्रा. डॉ. प्रशांत विघे यांच्या उमेदवारीच्या अनुषंगाने आयोजित सहविचार सभेत ते अध्यक्षस्थानावरून बोलत होते. सभेला विविध शिक्षक संघटनांचे पदाधिकारी, प्राचार्य, शिक्षक तसेच शिक्षण क्षेत्रातील कार्यकर्ते उपस्थित होते. 
सभेच्या व्यासपीठावर विदर्भ जनआंदोलन समितीचे प्राचार्य पी. आर. राजपूत, प्राचार्य डॉ. धर्मेंद्र तेलगोटे, प्राचार्य डॉ. दया पांडे, विनाअनुदानित इंग्रजी शाळांच्या संघटनेचे अभिजीत देशमुख, महाराष्ट्र राज्य स्वयंअर्थसहाय्यित व कॉन्व्हेंट संस्थांचे उपाध्यक्ष सुभाष धोटे तसेच विदर्भ माध्यमिक शिक्षक संघाचे प्राचार्य डॉ. ज्ञानेश्वर यावले उपस्थित होते.
महाराष्ट्र शासनाचा डॉ. जे. पी. नाईक आदर्श शिक्षक पुरस्कार प्राप्त प्रा. डॉ. प्रशांत विघे यांचा विविध शिक्षक संघटनांच्या वतीने यावेळी सत्कार करण्यात आला.
अभ्यासू नेतृत्वाची गरज : डॉ. धर्मेंद्र तेलगोटे
प्राचार्य डॉ. धर्मेंद्र तेलगोटे यांनी शिक्षकांच्या दैनंदिन अडचणी आणि शैक्षणिक संस्थांच्या प्रश्नांची प्रत्यक्ष जाण असलेल्या अभ्यासू प्रतिनिधित्वाची गरज व्यक्त केली. डॉ. प्रशांत विघे यांनी विद्यापीठाच्या सिनेटमध्ये विविध शैक्षणिक प्रश्नांवर केलेल्या कामाचा उल्लेख करताना त्यांचा अनुभव शिक्षक मतदारसंघातील प्रश्न मांडण्यासाठी उपयुक्त ठरू शकतो, असे त्यांनी सांगितले.
वास्तव परिस्थितीची जाणीव असलेला प्रतिनिधी आवश्यक : सुभाष धोटे
सुभाष धोटे यांनी शिक्षक, शिक्षकेतर कर्मचारी आणि शैक्षणिक संस्थांसमोरील प्रश्नांचा संदर्भ देत बदलत्या परिस्थितीचा अभ्यास करणारे आणि वस्तुनिष्ठ भूमिका मांडणारे नेतृत्व आवश्यक असल्याचे नमूद केले. शिक्षण क्षेत्रातील प्रत्यक्ष अनुभवाच्या आधारे प्रश्नांची मांडणी करण्याची गरज त्यांनी व्यक्त केली.
प्रश्नांच्या निराकरणासाठी सातत्यपूर्ण पाठपुरावा : डॉ. दया पांडे 
प्राचार्य डॉ. दया पांडे यांनी केवळ प्रश्न मांडण्यापेक्षा त्याच्या निराकरणासाठी सातत्याने पाठपुरावा करणारी कार्यपद्धती महत्त्वाची असल्याचे सांगितले. प्रशासनाच्या विविध स्तरांवर प्रभावीपणे काम करून प्रश्न मार्गी लावण्याची क्षमता असलेले नेतृत्व आवश्यक आहे. राष्ट्रीय शैक्षणिक धोरणाच्या अंमलबजावणीतील अडचणी आणि उच्च शिक्षणातील बदलांवर विधिमंडळात सखोल चर्चा होण्याची गरज असल्याचे त्यांनी प्रतिपादन केले.
सिनेटमधील कामाचा अनुभव उपयोगी ठरेल : पी. आर. राजपूत
प्राचार्य पी. आर. राजपूत यांनी विद्यापीठाच्या सिनेटमधील डॉ. प्रशांत विघे यांच्या कार्याचा संदर्भ देत शैक्षणिक प्रश्नांवर काम करण्याचा त्यांना अनुभव असल्याचे सांगितले. हा अनुभव शिक्षक मतदारसंघातील प्रश्न मांडताना उपयोगी ठरू शकतो, असा विश्वास त्यांनी व्यक्त केला.
“व्यापक शैक्षणिक हितासाठी शिक्षकांनी एकत्र यावे” : वामनराव चटप
माजी आमदार वामनराव चटप यांनी शिक्षक मतदारसंघाच्या निर्मितीमागील उद्देश स्पष्ट केला. शिक्षण क्षेत्रातील विविध घटकांना विधिमंडळात स्वतंत्र प्रतिनिधित्व मिळावे आणि त्यांच्या प्रश्नांना शासनाच्या पातळीवर स्थान मिळावे, यासाठी ही व्यवस्था महत्त्वाची आहे.
शिक्षक संघटनांनी आपापले मतभेद बाजूला ठेवून व्यापक शैक्षणिक हिताचा विचार करावा. शासनाकडे मागण्या मांडताना संघटित प्रयत्न, सातत्य आणि अभ्यासपूर्ण भूमिका आवश्यक असते. शिक्षण क्षेत्राशी संबंधित विविध घटकांचा समन्वय साधून त्यांचा आवाज अधिक प्रभावी करण्यासाठी प्रयत्न व्हायला हवेत, असे चटप यांनी सांगितले.
“निवडणुकीपलीकडे शिक्षण क्षेत्राची व्यापक चळवळ उभी करू” : डॉ. प्रशांत विघे 
प्रा. डॉ. प्रशांत विघे यांनी आपल्या मनोगतात शिक्षकांच्या प्रश्नांसाठी व्यापक सहभागाची गरज व्यक्त केली. ही प्रक्रिया केवळ निवडणुकीपुरती मर्यादित न ठेवता शिक्षण क्षेत्रातील विविध घटकांना जोडणाऱ्या चळवळीच्या रूपाने पुढे नेण्याचा प्रयत्न राहील, असे त्यांनी सांगितले.
“शिक्षण क्षेत्राशी संबंधित विविध घटकांनी या चळवळीत पुढाकार घेऊन सहभागी व्हावे. शिक्षकांच्या प्रश्नांसाठी सामूहिक प्रयत्नांची आवश्यकता आहे. आपण सर्वजण एकत्र आलो, तर ही भूमिका अधिक व्यापकपणे पुढे नेता येईल. शिक्षकांनी दाखविलेला विश्वास हीच या प्रयत्नांची मोठी ताकद आहे,” असे डॉ. विघे यांनी नमूद केले.
सभेत अनुदानित व विनाअनुदानित संस्थांचे प्रश्न, शिक्षकांच्या सेवा-संबंधित अडचणी, राष्ट्रीय शैक्षणिक धोरणाची अंमलबजावणी, उच्च शिक्षणातील बदल, शैक्षणिक संस्थांसमोरील आर्थिक आव्हाने आणि शिक्षकांचे प्रतिनिधित्व या विषयांवर विचारविनिमय करण्यात आला.
कार्यक्रमाला विविध शिक्षक संघटनांचे पदाधिकारी, प्राचार्य, शिक्षक आणि शिक्षण क्षेत्रातील कार्यकर्ते उपस्थित होते. सहविचार सभेच्या माध्यमातून शिक्षकांच्या प्रश्नांबरोबरच शिक्षक मतदारसंघातील प्रभावी प्रतिनिधित्व आणि शिक्षण क्षेत्राच्या भवितव्यावर चर्चा झाली.
प्रा. डॉ. प्रशांत विघे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील माहिती आणि लेख उपलब्ध करून देतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष लेखणीच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. आपल्या लेखणीच्या माध्यमातून ते विविध विषयांवर सखोल आणि प्रभावी लेख प्रकाशित करतात.
मो. क्र. -९३२६८७७७४९
