महायुतीतील जागावाटपावरून राजकारण तापले; जळगावात पुढच्या पिढीतील नेत्यांना संधी मिळण्याची शक्यता.
जळगाव : आगामी विधान परिषद निवडणुकांच्या पार्श्वभूमीवर जळगाव जिल्ह्यातील राजकीय वातावरण चांगलेच तापले असून महायुतीतील जागावाटपाबाबत उत्सुकता शिगेला पोहोचली आहे. जळगावची जागा कोणत्या पक्षाच्या वाट्याला जाणार, याबाबत अद्याप स्पष्ट निर्णय झालेला नाही. मात्र यंदा तरुण आणि उच्चशिक्षित चेहऱ्याला संधी मिळण्याची शक्यता अधिक असल्याची राजकीय वर्तुळात चर्चा आहे.
या पार्श्वभूमीवर माजी पालकमंत्री आणि राष्ट्रवादी काँग्रेस (अजित पवार गट)चे ज्येष्ठ नेते गुलाबराव देवकर यांचे चिरंजीव विशाल देवकर यांचे नाव भाजपकडून संभाव्य उमेदवार म्हणून चर्चेत आले आहे. तर दुसरीकडे शिवसेनेचे (महायुती) वजनदार नेते आणि पालकमंत्री गुलाबराव पाटील यांचे चिरंजीव प्रतापराव पाटील यांचेही नाव उमेदवारीच्या शर्यतीत असल्याची माहिती आहे. त्यामुळे या निवडणुकीत दोन प्रभावी राजकीय कुटुंबांतील युवा चेहऱ्यांमध्ये थेट स्पर्धा पाहायला मिळण्याची शक्यता व्यक्त केली जात आहे.
जिल्ह्यातील राजकीय विश्लेषकांच्या मते, खानदेशातील विकासाचा प्रलंबित बॅकलॉग लक्षात घेता विधान परिषदेत नव्या, तरुण आणि अभ्यासू नेतृत्वाची गरज आहे. विशाल देवकर यांना उच्चशिक्षित आणि आधुनिक दृष्टिकोन असलेले नेतृत्व म्हणून पाहिले जात असल्याने त्यांना संधी मिळाल्यास जिल्ह्याच्या प्रश्नांना नवी दिशा मिळू शकते, असे मत व्यक्त केले जात आहे.
महायुतीतील घटक पक्ष—भाजप, राष्ट्रवादी काँग्रेस आणि शिवसेना—यांच्यात उमेदवारीवर अंतिम निर्णय अद्याप झालेला नसून पक्षश्रेष्ठींच्या निर्णयाकडे सर्वांचे लक्ष लागले आहे. कोणत्या नावावर शिक्कामोर्तब होणार, यावर पुढील राजकीय समीकरणे ठरणार आहेत.
जळगाव जिल्ह्याने महाराष्ट्राच्या राजकारणाला अनेक दिग्गज नेते दिले असून आता पुन्हा एकदा ‘नेक्स्ट जनरेशन’ नेतृत्वाला संधी मिळणार का, याची उत्सुकता वाढली आहे. आगामी निवडणुकीत तरुण चेहऱ्यांना प्राधान्य मिळाल्यास जिल्ह्याच्या विकास प्रक्रियेला नवी गती मिळेल, असा विश्वास व्यक्त केला जात आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989
ईमेल – sthaniksamacharbharat@gmail.com
