‘बाबासाहेबांचे विचार डोक्यात ठेवल्यास सर्व आघाड्यांवर सरशी मिळेल’, असा प्रेरणादायी संदेश प्रा. डॉ. जतीन मेढे यांनी भुसावळातील गुणवंत विद्यार्थ्यांच्या गौरव सोहळ्यात दिला.
भुसावळ तालुक्यातील फेब्रुवारी-मार्च २०२६ मध्ये झालेल्या दहावी आणि बारावीच्या परीक्षेत प्रथम, द्वितीय व तृतीय क्रमांकाने यश संपादन करणाऱ्या अनुसूचित जातीतील गुणवंत विद्यार्थ्यांचा ‘यशवंतांचा गौरव समारंभ’ प्रागतिक विचार मंच, भुसावळ जिल्हा जळगाव यांच्या वतीने रविवार, ९ ऑगस्ट २०२६ रोजी नाहाटा महाविद्यालयाच्या ग्रंथालय सभागृहात उत्साहपूर्ण वातावरणात पार पडला. गुणवंत विद्यार्थ्यांचा सन्मान करून त्यांच्या शैक्षणिक यशाला प्रोत्साहन देण्यासोबतच इतर विद्यार्थ्यांसमोर प्रेरणादायी आदर्श निर्माण करण्याच्या उद्देशाने या कार्यक्रमाचे आयोजन करण्यात आले होते.
या गौरव समारंभाच्या अध्यक्षस्थानी प्रभावी वक्ते, साहित्य समीक्षक प्रा. डॉ. जतीन मेढे होते. तर प्रागतिक विचार मंचचे अध्यक्ष जे. पी. सपकाळे यांच्या मार्गदर्शनाखाली कार्यक्रमाचे आयोजन करण्यात आले. प्रमुख पाहुणे म्हणून वरणगावचे लोकनियुक्त नगराध्यक्ष सुनील रमेश काळे, जळगावचे पोलीस निरीक्षक प्रमोद रामकृष्ण कठोरे आणि माजी सभापती राजेंद्र पुंडलिक चौधरी उपस्थित होते. तसेच निमंत्रण पत्रिकेतील प्रमुख पाहुणे डॉ. राजेश मानवतकर यांचीही कार्यक्रमाला उपस्थिती होती. 
कार्यक्रमात भुसावळ तालुक्यातील दहावी व बारावी परीक्षेत उल्लेखनीय यश मिळविलेल्या गुणवंत विद्यार्थ्यांचा मान्यवरांच्या हस्ते गौरव करण्यात आला. विद्यार्थ्यांच्या शैक्षणिक यशाचे कौतुक करताना मान्यवरांनी शिक्षण हे सामाजिक व वैयक्तिक प्रगतीचे प्रभावी माध्यम असून, विद्यार्थ्यांनी कठोर परिश्रम, सातत्य आणि आत्मविश्वासाच्या जोरावर आपल्या ध्येयाचा पाठपुरावा करावा, असे आवाहन केले.
UPSC आणि IIT खडगपूरच्या यशस्वी विद्यार्थ्यांचा विशेष सत्कार
या सोहळ्यात स्पर्धा परीक्षेत उल्लेखनीय यश संपादन करून UPSC परीक्षा उत्तीर्ण झालेले अक्षय विजय बाऱ्हे तसेच IIT खडगपूर येथून M.Tech पदवी संपादन केलेले कौस्तुभ सुभाष लोखंडे यांचा मान्यवरांच्या हस्ते विशेष गौरव व सत्कार करण्यात आला. त्यांच्या यशामुळे भुसावळ तालुक्याच्या शैक्षणिक क्षेत्राची प्रतिष्ठा वाढली असून, ग्रामीण व सर्वसामान्य कुटुंबातील विद्यार्थीदेखील योग्य मार्गदर्शन, जिद्द आणि सातत्यपूर्ण मेहनतीच्या बळावर देशातील प्रतिष्ठित शैक्षणिक व स्पर्धा परीक्षांमध्ये यश मिळवू शकतात, असा प्रेरणादायी संदेश या सत्कारातून देण्यात आला.
‘बाबासाहेबांचे विचार डोक्यात ठेवा, सर्व आघाड्यांवर सरशी मिळेल’
कार्यक्रमाचे अध्यक्ष प्रा. डॉ. जतीन मेढे यांनी आपल्या अध्यक्षीय भाषणातून विद्यार्थ्यांना अत्यंत प्रभावी आणि प्रेरणादायी मार्गदर्शन केले. त्यांनी भारतरत्न डॉ. बाबासाहेब आंबेडकर यांच्या जीवनातील संघर्ष, शिक्षणासाठी त्यांनी केलेले अथक प्रयत्न आणि प्रतिकूल परिस्थितीवर मात करून मिळविलेले यश यांचे विविध संदर्भ विद्यार्थ्यांसमोर मांडले.
डॉ. मेढे यांनी विद्यार्थ्यांना जिद्द, चिकाटी आणि शिक्षणाची कास सोडू नये, असा संदेश देताना “विद्यार्थ्यांनी बाबासाहेबांचे विचार डोक्यात ठेवले, तर जीवनाच्या सर्व आघाड्यांवर त्यांना निश्चितच सरशी मिळेल,” असे प्रतिपादन केले. त्यांच्या ओघवत्या आणि प्रभावी वक्तृत्वाने उपस्थित विद्यार्थी, पालक व नागरिक भारावून गेले. बाबासाहेबांच्या संघर्षमय जीवनातील प्रसंग सांगताना सभागृहातील वातावरण भावनिक झाले.
मान्यवरांची मोठी उपस्थिती
या कार्यक्रमाला राष्ट्रवादी काँग्रेसचे वरणगाव शहराध्यक्ष प्रा. राहुल जोहरे, प्रा. अजित कलवले, बाळा मोरे, अल्बर्ट तायडे, नगरसेविका सीमा नरवाडे, शांताबाई सुरवाडे, तसेच ज्योत्स्ना मेढे, वंदना जाधव, अल्का सपकाळे, वैशाली सुरवाडे आदी मान्यवर उपस्थित होते. याशिवाय परिसरातील नागरिक, गुणवंत विद्यार्थी, पालक आणि विद्यार्थी मोठ्या संख्येने उपस्थित राहिले.
कार्यक्रमाचे उत्कृष्ट सूत्रसंचालन आयोजन समितीचे सदस्य समाधान जाधव यांनी केले, तर देवेंद्र तायडे यांनी उपस्थितांचे आभार मानले. कार्यक्रम यशस्वी करण्यासाठी आयोजन समितीचे सदस्य दिलीप सुरवाडे, देवेंद्र तायडे, प्रा. प्रशांत नरवाडे, विनोद बाऱ्हे, वाल्मीक देहाडे, संघरत्न सपकाळे, पप्पू वानखेडे आणि भारतीताई अवचारे यांनी विशेष परिश्रम घेतले.
गुणवंत विद्यार्थ्यांचा गौरव, यशस्वी विद्यार्थ्यांचा विशेष सत्कार आणि डॉ. बाबासाहेब आंबेडकरांच्या विचारांतून मिळालेली प्रेरणा यामुळे ‘यशवंतांचा गौरव समारंभ’ विद्यार्थ्यांसाठी अत्यंत प्रेरणादायी ठरला. शिक्षणाच्या माध्यमातून सामाजिक प्रगती साधण्याचा आणि पुढील पिढीला उच्च शिक्षणासाठी प्रोत्साहित करण्याचा सकारात्मक संदेश या कार्यक्रमातून देण्यात आला.
प्रा. राहुल जोहरे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवर लिखाण करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष लिखाणाच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात.
मो. क्र. +91 96041 53358 , इमेल – rahuljohare358@gmail.com
