लातूरच्या जिल्हा परिषद कन्या प्रशालेत ‘सायबर शिक्षा फॉर सायबर सुरक्षा’ उपक्रम; विद्यार्थिनींचा प्रश्नोत्तरातून उत्स्फूर्त सहभाग आणि सुरक्षित डिजिटल वापराचा संदेश.
डिजिटल तंत्रज्ञानाचा वाढता वापर आणि त्यासोबत वाढणाऱ्या सायबर फसवणुकीच्या पार्श्वभूमीवर विद्यार्थिनींनी ऑनलाइन व्यवहार तसेच सोशल मीडियाचा वापर करताना अधिक सजग राहणे आवश्यक आहे. याच उद्देशाने राजर्षी शाहू महाविद्यालय, लातूर आणि क्विक हील फाउंडेशन, पुणे यांच्या संयुक्त विद्यमाने राबविण्यात येत असलेल्या ‘सायबर शिक्षा फॉर सायबर सुरक्षा’ उपक्रमांतर्गत जिल्हा परिषद कन्या प्रशाला, गव्हर्नमेंट कॉलनी, लातूर येथे सायबर सुरक्षा जनजागृती सत्राचे आयोजन करण्यात आले.
फोटो मॉर्फिंगपासून सोशल मीडिया सुरक्षेपर्यंत मार्गदर्शन
या सत्रात इयत्ता ५ वी ते ७ वीतील विद्यार्थिनींना डिजिटल जगातील विविध सायबर धोक्यांची माहिती देण्यात आली. सायबर वॉरिअर नरेश पंडित, अविष्कार कांबळे आणि श्रेयश माकणे यांनी विद्यार्थिनींशी संवाद साधत सायबर गुन्ह्यांपासून स्वतःचे संरक्षण करण्यासाठी आवश्यक सुरक्षित डिजिटल सवयींबाबत मार्गदर्शन केले.
यावेळी फोटो मॉर्फिंग, ए.आय.च्या माध्यमातून तयार होणारी छायाचित्रे, मजबूत पासवर्ड, ॲप परमिशन्स, संशयास्पद लिंक, सोशल मीडिया सुरक्षा आणि वैयक्तिक माहितीची गोपनीयता या विषयांवर सोप्या उदाहरणांच्या माध्यमातून माहिती देण्यात आली.
मोबाईलमध्ये कोणतेही ॲप इन्स्टॉल करताना अनावश्यक परवानग्या देऊ नयेत, अनोळखी किंवा संशयास्पद लिंकवर क्लिक करू नये, तसेच ओटीपी, पासवर्ड आणि वैयक्तिक माहिती कोणासोबतही शेअर करू नये, याबाबत विद्यार्थिनींना विशेष मार्गदर्शन करण्यात आले.
प्रश्नोत्तरातून विद्यार्थिनींचा उत्स्फूर्त सहभाग
जनजागृती सत्रादरम्यान विद्यार्थिनींनी विविध प्रश्न विचारून आपल्या शंकांचे निरसन करून घेतले. संवादात्मक पद्धतीने झालेल्या या सत्रामुळे विद्यार्थिनींना डिजिटल जगातील संभाव्य धोके आणि त्यापासून बचाव करण्याच्या उपाययोजनांची माहिती अधिक सोप्या पद्धतीने समजली.
शिक्षकांचे सहकार्य
कार्यक्रमासाठी विद्यालयाचे मुख्याध्यापक भगवान माळी सर यांचे मार्गदर्शन लाभले. उमाटे के. आर. सर यांनी कार्यक्रमाच्या आयोजनासाठी विशेष सहकार्य केले. तसेच विद्यालयातील सर्व शिक्षकांची उपस्थिती लाभली.
डिजिटल साधनांचा वापर करताना सतर्कता, जबाबदारी आणि सुरक्षिततेला प्राधान्य देणे आवश्यक आहे, हा महत्त्वपूर्ण संदेश या जनजागृती उपक्रमातून विद्यार्थिनींपर्यंत पोहोचविण्यात आला.
प्रकाश खिलारे हे स्थानिक समाचार डिजिटल मीडिया चे सहसंपादक असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपण आपल्या परिसरातील बातम्या, माहिती तसेच लेख देण्याकरिता संपर्क करू शकतात…..
मो. 9112225235
Email- prakaashkhilare@gmail.com
