जळगावच्या स्मार्ट वॉटर मीटरचे तांत्रिक अहवाल, बिलिंगची अचूकता आणि तक्रार निवारण प्रक्रिया सार्वजनिक करण्याची मागणी; जाणून घ्या सविस्तर बातमी.
जळगाव : शहरात अमृत पाणीपुरवठा योजनेअंतर्गत बसविण्यात येणाऱ्या ‘सेंसूस’ (Sensus) स्मार्ट वॉटर मीटरच्या अचूकतेबाबत आणि देखभालीच्या जबाबदारीबाबत नागरिकांनी प्रश्न उपस्थित केले आहेत. खंडित पाणीपुरवठ्यामुळे पाइपलाइनमध्ये साचणारी हवा, पाण्यासोबत वाहून येणारा गाळ आणि पाण्याच्या उलट प्रवाहाचा मीटरच्या रीडिंगवर परिणाम होतो का, याबाबत महानगरपालिका प्रशासनाने तांत्रिक स्पष्टीकरण द्यावे, अशी मागणी नागरिक राजेन्द्र गाडगीळ यांनी केली आहे. यासंदर्भात त्यांनी महापालिका आयुक्त आणि महापौरांकडे निवेदनाद्वारे मागण्या मांडण्याची भूमिका घेतली आहे.
खंडित पाणीपुरवठ्यामुळे रीडिंगच्या अचूकतेवर प्रश्न
जळगाव शहरात साधारणपणे तीन दिवसांतून एकदा, तर काही वेळा दुरुस्तीच्या कामांमुळे चार दिवसांनंतर पाणीपुरवठा होतो. अशा खंडित पाणीपुरवठ्यामुळे पाइपलाइनमध्ये हवा साचणे, पाणी सुरू होताना दाबात अचानक बदल होणे आणि पाण्यासोबत गाळ वाहून येणे, अशा परिस्थिती उद्भवू शकतात.
या पार्श्वभूमीवर स्मार्ट मीटरद्वारे होणारी पाणीमोजणी कितपत अचूक आहे आणि त्यानुसार आकारण्यात येणाऱ्या बिलाची खात्री कशी केली जाणार, याबाबत नागरिकांना स्पष्ट माहिती मिळणे आवश्यक असल्याचे गाडगीळ यांनी नमूद केले आहे.
हवेची नोंद पाण्याच्या वापरात होणार का?
पाणीपुरवठा सुरू होताना पाइपलाइनमधील हवा बाहेर पडते. अशा वेळी मीटर केवळ पाण्याचेच मोजमाप करतो का? हवेचे बुडबुडे असल्यास रीडिंगमध्ये फरक पडण्याची शक्यता आहे का? तसेच पाइपलाइनमध्ये पाणी नसल्याची स्थिती ओळखण्यासाठी मीटरमध्ये विशेष यंत्रणा आहे का? असे प्रश्न उपस्थित करण्यात आले आहेत.
पाण्याचा उलट प्रवाह झाल्यास मीटर त्याची नोंद कशी करतो आणि अशा प्रवाहाचे मोजमाप एकूण वापरातून वजा केले जाते का, याबाबतही प्रशासनाने माहिती द्यावी, अशी मागणी करण्यात आली आहे. या बाबींचे तांत्रिक स्पष्टीकरण मिळाल्यास मीटरच्या रीडिंगबाबत आणि संभाव्य अतिरिक्त बिलाबाबत नागरिकांच्या मनातील शंकांचे निरसन होण्यास मदत होईल.
बॅटरी, दुरुस्ती आणि देखभालीचा खर्च कोण उचलणार?
स्मार्ट वॉटर मीटरमध्ये वापरण्यात येणाऱ्या लिथियम बॅटरीचे अपेक्षित आयुष्य किती आहे, बॅटरी संपल्यानंतर ती स्वतंत्रपणे बदलता येते का आणि इलेक्ट्रॉनिक बिघाड झाल्यास संपूर्ण मीटर बदलण्याची आवश्यकता असते का, असे प्रश्नही उपस्थित करण्यात आले आहेत.
मीटरची नियमित देखभाल, दुरुस्ती आणि बिघाड झाल्यास तो बदलण्याचा खर्च महानगरपालिका उचलणार की ग्राहकांकडून वसूल केला जाणार, याबाबत स्पष्ट धोरण जाहीर करावे, अशी मागणी गाडगीळ यांनी केली आहे. तसेच मीटरमध्ये तांत्रिक बिघाड झाल्यास नागरिकांना वेळेत सेवा मिळण्यासाठी कंपनीचे प्रशिक्षित तंत्रज्ञ आणि अधिकृत सेवा केंद्र उपलब्ध करून देण्याची व्यवस्था करावी, असेही त्यांनी म्हटले आहे.
फिल्टर आणि नॉन-रिटर्न व्हॉल्व्हबाबत स्पष्टीकरणाची मागणी
जळगाव शहराला पुरविण्यात येणाऱ्या पाण्यातील गाळ किंवा सूक्ष्म हवेच्या बुडबुड्यांचा मीटरच्या कार्यक्षमतेवर परिणाम होतो का, याबाबतही तांत्रिक माहिती देण्याची मागणी करण्यात आली आहे. याशिवाय प्रत्येक मीटरच्या आधी फिल्टर किंवा स्ट्रेनर तसेच नॉन-रिटर्न व्हॉल्व्ह बसविणे आवश्यक आहे का, हेही प्रशासनाने स्पष्ट करावे, अशी भूमिका गाडगीळ यांनी मांडली आहे.
तांत्रिक अहवाल आणि तक्रार निवारण प्रक्रिया सार्वजनिक करा
स्मार्ट वॉटर मीटरविषयी नागरिकांना वस्तुनिष्ठ माहिती मिळावी, यासाठी संबंधित मीटरची अधिकृत तांत्रिक माहितीपत्रिका (Technical Datasheet), उपलब्ध असल्यास क्षेत्रीय चाचणी अहवाल (Validation/Field Test Report), बॅटरीचे अपेक्षित आयुष्य आणि देखभालीसंदर्भातील अटी सार्वजनिक कराव्यात, अशी मागणी करण्यात आली आहे.
तसेच मीटरचे रीडिंग चुकीचे असल्याची ग्राहकाची तक्रार आल्यास त्याची तपासणी कशी केली जाईल, मीटरच्या अचूकतेची पडताळणी कोण करणार आणि तक्रारीचे निराकरण करण्यासाठी कोणती प्रक्रिया अवलंबली जाणार, याची माहितीही नागरिकांना उपलब्ध करून द्यावी, असे गाडगीळ यांनी नमूद केले आहे.
नागरिकांना विश्वासात घेण्याची अपेक्षा
स्मार्ट वॉटर मीटर योजनेची अंमलबजावणी करताना तांत्रिक पारदर्शकता राखणे, नागरिकांच्या शंकांचे निरसन करणे आणि तक्रार निवारणाची प्रभावी व्यवस्था निर्माण करणे आवश्यक असल्याचे गाडगीळ यांनी अधोरेखित केले आहे.
प्रत्यक्ष पाणीवापरानुसारच बिल आकारले जात असल्याची खात्री नागरिकांना मिळावी, तसेच मीटरची कार्यपद्धती, अचूकता आणि देखभालीची जबाबदारी याबाबत महानगरपालिका प्रशासनाने स्पष्ट भूमिका जाहीर करावी, अशी अपेक्षा त्यांनी व्यक्त केली आहे.
राजेंद्र गाडगीळ हे स्थानिक समाचार डिजिटल मीडिया चे सक्रिय योगदानकर्ता असून सामाजिक,शैक्षणिक, पर्यावरण आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष लेखनाच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी लेख प्रकाशित करतात.
मो. 8999809416, email- gadgilrd@gmail.com
