घोडसगाव परिसरात दरोड्याच्या तयारीत असलेल्या टोळीविरोधात मुक्ताईनगर पोलिसांची धडक कारवाई. गावठी पिस्तूल, मोबाईल आणि वाहनासह लाखो रुपयांचा मुद्देमाल जप्त.
मुक्ताईनगर पोलिसांनी घोडसगाव येथील राष्ट्रीय महामार्गावरील पुलाजवळ दरोड्याच्या तयारीत असलेल्या टोळीवर धाडसी कारवाई करत दोन संशयितांना अटक केली आहे. तर टोळीतील तीन जण घटनास्थळावरून फरार होण्यात यशस्वी झाले. या कारवाईत गावठी पिस्तूल, जिवंत काडतुसे, स्कॉर्पिओ वाहन, मोबाईल फोन आणि दरोड्यासाठी वापरण्यात येणारे साहित्य असा एकूण ५ लाख ६० हजार ४०० रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, २९ मे २०२६ रोजी पहाटे सुमारे ६ वाजण्याच्या सुमारास घोडसगाव येथील राष्ट्रीय महामार्गावरील पुलाजवळ काही संशयित व्यक्ती दरोडा टाकण्याच्या तयारीत असल्याची गोपनीय माहिती मुक्ताईनगर पोलिसांना मिळाली होती. माहितीची खातरजमा केल्यानंतर पोलिसांनी तात्काळ घटनास्थळी सापळा रचून छापा टाकला.
या कारवाईत चंद्रकांत विष्णू वाघ (वय ३०) आणि कैलास कारभारी घोडके (वय ३२, दोघे रा. चिंचोली आडगाव, जि. छत्रपती संभाजीनगर) यांना ताब्यात घेण्यात आले. मात्र टोळीचा मुख्य सूत्रधार मानला जाणारा प्रशांत उर्फ परशुराम मोहन गायकवाड आणि त्याचे अन्य दोन साथीदार पोलिसांना चकवा देत फरार झाले. फरार आरोपींचा शोध घेण्यासाठी विशेष पथके रवाना करण्यात आली आहेत.
कारवाईदरम्यान पोलिसांनी आरोपींकडून एमएच-१९ बीयू-६६९५ क्रमांकाची स्कॉर्पिओ, एक गावठी पिस्तूल, दोन जिवंत काडतुसे, लोखंडी रॉड, दोरी, मिरची पावडर, आयफोन आणि ओप्पो कंपनीचे मोबाईल फोन जप्त केले. या सर्व साहित्याची एकूण किंमत ५ लाख ६० हजार ४०० रुपये इतकी असल्याचे पोलिसांनी सांगितले.
प्राथमिक तपासात आरोपी महामार्गावरील वाहनांना लक्ष्य करून दरोडा टाकण्याच्या तयारीत असल्याचा संशय व्यक्त करण्यात येत आहे. पोलिसांकडून आरोपींची कसून चौकशी सुरू असून या टोळीचा इतर गुन्ह्यांशी संबंध आहे का, याचाही तपास केला जात आहे.
या प्रकरणी मुक्ताईनगर पोलीस ठाण्यात भारतीय न्याय संहिता (बीएनएस) कलम ३१०(४) तसेच शस्त्र अधिनियम कलम ३/२५ अन्वये गुन्हा दाखल करण्यात आला आहे.
घटनेची माहिती मिळताच उपविभागीय पोलीस अधिकारी केदार बारबोले यांनी घटनास्थळी भेट देऊन पाहणी केली. पोलीस निरीक्षक राजेंद्र चाटे यांच्या मार्गदर्शनाखाली पुढील तपास सुरू आहे.
वेळीच मिळालेल्या गुप्त माहितीच्या आधारे मुक्ताईनगर पोलिसांनी ही कारवाई केल्यामुळे संभाव्य मोठा दरोडा टळला असून परिसरात पोलिसांच्या तत्परतेचे आणि धाडसी कामगिरीचे नागरिकांकडून कौतुक केले जात आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989
ईमेल – sthaniksamacharbharat@gmail.com
