भुसावळ : कडाक्याच्या उन्हाळ्यामुळे शहरावर पाणीटंचाईचे गंभीर संकट घोंगावत आहे. पालिकेच्या बंधाऱ्यात सध्या केवळ १५ दिवस पुरेल इतकाच पाणीसाठा उरला असून जलपातळी थेट जॅकवेलपर्यंत खाली गेली आहे. त्यामुळे प्रशासनासह नागरिकांमध्ये चिंतेचे वातावरण निर्माण झाले आहे. आता सर्वांचे लक्ष पुढील आवर्तनाकडे लागले आहे.
गेल्या महिन्यात हतनूर धरण येथून भुसावळसाठी आवर्तन सोडण्यात आले होते. त्या वेळी बंधारा तुडुंब भरल्याने सुमारे ३८ ते ४० दिवस पाणीपुरवठा सुरळीत सुरू होता. या साठ्यावर शहरात दर १० दिवसांनी पाणीपुरवठा केला जातो. मात्र, यंदाच्या तीव्र उष्णतेमुळे हे संपूर्ण गणित बिघडले आहे.
गेल्या आठवडाभरापासून तापमान ४० अंश सेल्सिअसच्या पुढे गेल्याने बाष्पीभवनाचा वेग मोठ्या प्रमाणात वाढला आहे. परिणामी, साधारण आठवडाभर पुरेल इतके पाणी अक्षरशः वाफ होऊन गेले. त्यामुळे बंधाऱ्याची पातळी झपाट्याने घसरली असून अपेक्षेपेक्षा लवकर नवीन आवर्तनाची गरज निर्माण झाली आहे.
भुसावळ शहरासोबतच मध्य रेल्वेलाही या पाणीसाठ्यावर अवलंबून राहावे लागते, त्यामुळे पाण्यावर अतिरिक्त ताण येत आहे. वेळेत आवर्तन मिळाले नाही, तर शहराचा पाणीपुरवठा पूर्णपणे ठप्प होण्याची शक्यता व्यक्त केली जात आहे.
नागरिकांची तातडीच्या उपाययोजनांची मागणी
पाणीटंचाईच्या वाढत्या संकटामुळे नागरिकांमध्ये असंतोष निर्माण झाला आहे. नियमित व पुरेसा पाणीपुरवठा व्हावा तसेच हतनूर धरणातून तातडीने आवर्तन सोडावे, अशी मागणी जोर धरत आहे. येत्या काही दिवसांत उपाययोजना न झाल्यास परिस्थिती अधिक गंभीर होण्याची भीती व्यक्त होत आहे.
गळती व निष्काळजीपणामुळे वाढते संकट
पाणी वितरण व्यवस्थेतील गळती ही सध्या मोठी समस्या ठरत आहे. जुन्या पाइपलाइन, सैल व्हॉल्व्ह आणि वेळेवर दुरुस्ती न झाल्यामुळे मोठ्या प्रमाणात पाणी वाया जात आहे. यावर उपाय म्हणून पालिकेने गळती शोधून तातडीने दुरुस्ती करण्याचा निर्णय घेतला आहे.
तसेच अनेक घरांमध्ये नळांना तोट्या नसल्याने पाणी भरल्यानंतरही वाहत राहते, त्यामुळे पाण्याची मोठी नासाडी होते. ही बाब लक्षात घेऊन पालिका नागरिकांमध्ये जनजागृती मोहीम राबवणार आहे.
सध्याच्या परिस्थितीत प्रशासनाने तातडीने ठोस पावले उचलणे आणि नागरिकांनीही पाण्याचा काटकसरीने वापर करणे अत्यावश्यक बनले आहे.
#bhusawal #watercrisis #sthaniksamachar
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
