मुंबईत झालेल्या जोरदार पावसामुळे काही भागांत पाणी साचले असून वाहतूक विस्कळीत झाली आहे. कुलाबा आणि सांताक्रूझ येथे लक्षणीय पावसाची नोंद झाली आहे.
मुंबई शहर आणि उपनगरांत मंगळवारी सकाळपासून पावसाने जोरदार हजेरी लावली असून अनेक सखल भागांत पाणी साचण्यास सुरुवात झाली आहे. यामुळे काही ठिकाणी वाहतूक विस्कळीत झाली असून नागरिकांना अडचणींचा सामना करावा लागत आहे.
रविवारपासून सुरू झालेल्या वळिवाच्या पावसामुळे शहरातील तापमानात घट झाली असून वातावरणात गारवा निर्माण झाला आहे. मागील काही दिवसांपासून उष्णतेचा सामना करणाऱ्या मुंबईकरांना त्यामुळे दिलासा मिळाला आहे. हवामान विभागाने मुंबईसाठी मंगळवारी ‘यलो अलर्ट’ जारी केला असून दिवसभर वादळी पावसाची शक्यता वर्तवली आहे.
मागील २४ तासांत कुलाबा येथे ४९ मिमी, तर सांताक्रूझ येथे १२.३ मिमी पावसाची नोंद झाली. तासभर झालेल्या पावसामुळे सायनमधील गांधी मार्केट परिसरात बेस्ट बस बंद पडल्याने काही काळ वाहतूक कोंडी झाली. दादर आणि वडाळा परिसरातील सखल भागांतही पाणी साचल्याने वाहनचालकांना अडचणींचा सामना करावा लागला.
दरम्यान, मान्सूनने पुणे आणि अलिबागपर्यंत प्रगती केली असून लवकरच मुंबईत दाखल होण्याची शक्यता हवामान विभागाने व्यक्त केली आहे. २४ ते २७ जूनदरम्यान कोकण किनारपट्टीसह राज्यातील अनेक भागांत पावसाचा जोर वाढण्याचा अंदाज असल्याने पुढील काही दिवसांत नागरिकांना उष्णतेपासून अधिक दिलासा मिळण्याची अपेक्षा आहे.
मुंबईसह ठाणे आणि पालघर जिल्ह्यांनाही हवामान विभागाने ‘यलो अलर्ट’ जारी केला असून नागरिकांनी आवश्यक ती खबरदारी घेण्याचे आवाहन करण्यात आले आहे.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989
ईमेल – sthaniksamacharbharat@gmail.com
