मलकापूर तालुक्यातील शेतकऱ्यांचा आक्रोश—वीजतार चोरीमुळे शेतीपंप बंद, राष्ट्रवादी काँग्रेस अजित पवार गटाने कठोर कारवाईची मागणी केली.
मलकापूर तालुक्यात गेल्या काही दिवसांपासून विजेच्या तार चोरीच्या घटनांमध्ये मोठ्या प्रमाणात वाढ होत असून वाघूड, बहापुरा, धरणगावसह इतर गावांतील अनेक ठिकाणी वीजतारा चोरीस गेल्याच्या घटना समोर आल्या आहेत. त्यामुळे परिसरातील शेतकरी वर्गात भीती आणि चिंतेचे वातावरण निर्माण झाले आहे. विशेष म्हणजे पेरणीचे दिवस जवळ आले असताना अशा प्रकारच्या घटनांमुळे शेतीकामांवर गंभीर परिणाम होण्याची शक्यता व्यक्त केली जात आहे.
या पार्श्वभूमीवर संबंधित गावांतील शेतकऱ्यांनी पोलिस निरीक्षक गिरी यांची भेट घेत निवेदन सादर केले. चोरीच्या घटनांची तात्काळ दखल घेऊन संबंधित आरोपींविरुद्ध लवकरात लवकर एफ.आय.आर. दाखल करण्यात यावी, तसेच ग्रामीण भागात पोलिस गस्त वाढवून शेतकऱ्यांना संरक्षण द्यावे, अशी मागणी यावेळी करण्यात आली.
शेतकऱ्यांनी सांगितले की, वीजतारा चोरीमुळे शेतीपंप बंद पडत असून पिकांच्या पाण्याचा प्रश्न निर्माण होत आहे. आगामी पेरणी हंगामाच्या पार्श्वभूमीवर वीजपुरवठा सुरळीत राहणे अत्यंत गरजेचे असल्याने प्रशासनाने या प्रकरणाकडे गांभीर्याने लक्ष देण्याची आवश्यकता असल्याचे मत शेतकऱ्यांनी व्यक्त केले.
यावेळी राष्ट्रवादी काँग्रेस पार्टी अजित पवार गटाचे बुलढाणा जिल्हा कार्याध्यक्ष प्रसादभाऊ जाधव, शेतकरी संघटनेचे जिल्हाध्यक्ष निलेश नारखेडे, बाळू पाटील, तायडे गुरुजी, भगवान कुपसे, लक्ष्मण सोनवणे, विलास सोनवणे, शालिग्राम सातव, श्रीकृष्ण बोबडे, गजानन तायडे, प्रकाश शिरसागर, सोनाजी तायडे, अतुल इंगळे, संजय घाटे, शिवाजी तायडे यांच्यासह पंचक्रोशीतील शेतकरी मोठ्या संख्येने उपस्थित होते.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
