जळगाव स्थानकावर अमृतसर एक्सप्रेसला आग लागल्याने काही काळ खळबळ उडाली. कोणतीही जीवितहानी झाली नसून रेल्वे प्रशासनाने घटनेच्या कारणांची चौकशी सुरू केली आहे.
मुंबईहून अमृतसरकडे जाणाऱ्या ११०५७ अमृतसर एक्सप्रेसमध्ये बुधवारी (१ जुलै) सकाळी जळगाव रेल्वे स्थानकावर आग लागल्याची घटना घडली. सकाळी सुमारे ७ वाजता गाडी जळगाव स्थानकावर दाखल होताच जनरेटर बोगीच्या ब्रेक डिस्कमधून अचानक धूर निघू लागला. काही क्षणांतच धुराचे मोठे लोट उसळत आग लागल्याने स्थानकावर एकच खळबळ उडाली. प्लॅटफॉर्मवरील प्रवासी, विक्रेते आणि रेल्वे कर्मचारी काही काळ गोंधळून गेले. धूर वाढत असल्याचे पाहून अनेक प्रवासी तत्काळ डब्यांमधून खाली उतरले, तर काहींनी सुरक्षित अंतरावर धाव घेतली. त्यामुळे काही काळ स्थानकावर धावपळीचे वातावरण निर्माण झाले.
घटनेची माहिती मिळताच रेल्वे प्रशासन, आरपीएफ, तांत्रिक विभागाचे अधिकारी आणि कर्मचारी तातडीने घटनास्थळी दाखल झाले. परिस्थितीचे गांभीर्य लक्षात घेऊन जनरेटर बोगी परिसर त्वरित रिकामा करण्यात आला आणि आग विझविण्याची मोहीम हाती घेण्यात आली. जनरेटर बोगीमध्ये उपलब्ध असलेल्या अग्निशमन यंत्राच्या (फायर एक्स्टिंग्विशर) सहाय्याने काही मिनिटांतच आगीवर नियंत्रण मिळविण्यात आले. त्यामुळे आग इतर डब्यांमध्ये पसरण्यापूर्वीच परिस्थिती नियंत्रणात आली आणि संभाव्य मोठी दुर्घटना टळली.
प्राथमिक तपासात समोर आलेल्या माहितीनुसार, रेल्वे रुळावरील एक चावी उडून डीव्ही (डिस्ट्रिब्युटर व्हॉल्व्ह)ला लागल्याने एअर प्रेशर अचानक रिलीज झाले. परिणामी जनरेटर कार आणि सामान बोगीचे ब्रेक सतत दाबलेल्या स्थितीत राहिले. त्यामुळे ब्रेक डिस्कवर तीव्र घर्षण निर्माण झाले. वाढत्या तापमानामुळे प्रथम धूर निघाला आणि त्यानंतर ब्रेक डिस्कने पेट घेतला. ही संपूर्ण घटना काही क्षणांत घडल्याने प्रवाशांमध्ये भीतीचे वातावरण निर्माण झाले.
घटनेदरम्यान तांत्रिक सहाय्यक देवेंद्र गुरव यांनी वरिष्ठ अधिकाऱ्यांच्या मार्गदर्शनाखाली तत्परतेने एअर प्रेशर नियंत्रित करून ब्रेक यंत्रणा पूर्ववत करण्यात महत्त्वाची भूमिका बजावली. त्यांच्या या कार्यामुळे रेल्वेची तांत्रिक यंत्रणा लवकर सुरळीत झाली. त्यानंतर रेल्वेच्या तांत्रिक पथकाने जनरेटर कार, सामान बोगी तसेच संपूर्ण रेकची सखोल तपासणी केली. ब्रेक प्रणाली, एअर प्रेशर, चाके आणि अन्य यांत्रिक भागांची तपासणी करून सर्व काही सुरक्षित असल्याची खात्री करण्यात आली.
तांत्रिक तपासणी पूर्ण झाल्यानंतर सकाळी सुमारे ८.१५ वाजता अमृतसर एक्सप्रेस पुढील प्रवासासाठी रवाना करण्यात आली. या घटनेमुळे गाडीला सुमारे एक तासाचा विलंब झाला. मात्र प्रवाशांच्या सुरक्षिततेला प्राधान्य देत सर्व आवश्यक तपासण्या पूर्ण झाल्यानंतरच रेल्वेला हिरवा कंदील देण्यात आला.
या घटनेत कोणतीही जीवितहानी झाली नाही किंवा कोणताही प्रवासी जखमी झाला नाही. रेल्वे कर्मचाऱ्यांनी दाखविलेले प्रसंगावधान, तातडीची कार्यवाही आणि तांत्रिक कौशल्य यामुळे मोठा अनर्थ टळल्याची भावना प्रवाशांनी व्यक्त केली. अनेक प्रवाशांनी रेल्वे प्रशासनाच्या तत्पर प्रतिसादाचे कौतुक केले.
दरम्यान, या घटनेची नोंद रेल्वे प्रशासनाने घेतली असून, नेमके कारण आणि तांत्रिक बिघाडाची सखोल चौकशी सुरू करण्यात आली आहे. भविष्यात अशा घटना टाळण्यासाठी आवश्यक प्रतिबंधात्मक उपाययोजना करण्यात येणार असल्याचे रेल्वेच्या सूत्रांनी सांगितले.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989, ईमेल – sthaniksamacharbharat@gmail.com
