जळगाव विमानतळाला मोठी चालना; स्वस्त दरात दिल्ली व इंदूरसाठी थेट विमानसेवा, प्रवाशांकडून उत्सुकता.
जळगावकरांसाठी दीर्घ प्रतीक्षेनंतर अखेर आनंदाची बातमी समोर आली असून, शहराला हवाई वाहतुकीच्या नकाशावर अधिक बळकटी मिळणार आहे. Alliance Air कंपनीकडून दिल्ली–इंदूर–जळगाव तसेच जळगाव–इंदूर–दिल्ली ही विमानसेवा २ मे २०२६ पासून प्रायोगिक तत्त्वावर सुरू करण्यात येणार आहे. ही सेवा आठवड्यातून तीन दिवस—मंगळवार, गुरुवार आणि शनिवार—(त्रि-साप्ताहिक) धावणार आहे.
या नव्या विमानसेवेच्या सुरूवातीमुळे जळगावकरांना थेट दिल्लीसह उत्तर भारतातील विविध शहरांशी हवाई जोडणी मिळणार आहे. विशेष म्हणजे तिकीट दर सुमारे ३,००० रुपयांपासून सुरू होत असल्याने सर्वसामान्य प्रवाशांनाही ही सेवा परवडणारी ठरणार आहे. सध्या या सेवेसाठी बुकिंग सुरू झाले असून, प्रवाशांकडून उत्स्फूर्त प्रतिसाद मिळत आहे.
या विमानसेवेच्या मंजुरीसाठी आ .गिरीश महाजन, केंद्रीय मंत्री रक्षा खडसे, खा.स्मिता वाघ आणि आ. राजूमामा भोळे यांचे महत्त्वपूर्ण योगदान राहिले आहे. विशेषतः खासदार स्मिता वाघ यांनी गेल्या अनेक महिन्यांपासून केंद्र सरकार, नागरी विमान वाहतूक मंत्रालय आणि संबंधित विमान कंपन्यांशी सातत्याने पाठपुरावा केला होता. त्यांच्या अथक प्रयत्नांना यश मिळाल्याने ही सेवा प्रत्यक्षात येत आहे.
या विमानसेवेच्या माध्यमातून जळगावहून दिल्ली आणि इंदूर येथे जाणे-येणे अधिक सुलभ होणार आहे. यामुळे उत्तर भारतातील धार्मिक स्थळांना भेट देणाऱ्या भाविकांना, व्यावसायिकांना तसेच शिक्षणासाठी प्रवास करणाऱ्या विद्यार्थ्यांना मोठा फायदा होणार आहे. तसेच प्रवासाचा वेळही मोठ्या प्रमाणात कमी होणार असल्याने या सेवेला चांगला प्रतिसाद मिळण्याची अपेक्षा व्यक्त केली जात आहे.
ही सेवा १ मे ते ३१ मे २०२६ या कालावधीत प्रायोगिक स्वरूपात चालवली जाणार आहे. या कालावधीत प्रवाशांचा प्रतिसाद आणि सेवा व्यवहार्यता तपासण्यात येणार असून, प्रतिसाद समाधानकारक ठरल्यास ही सेवा नियमित करण्याबरोबरच तिचा विस्तार करण्याची शक्यता वर्तविण्यात येत आहे.
जळगाव विमानतळासाठी ही सेवा एक महत्त्वाचा टप्पा ठरणार असून, जिल्ह्याच्या औद्योगिक, व्यापारी आणि पर्यटन विकासाला यामुळे चालना मिळेल, असा विश्वास स्थानिक उद्योगपती आणि प्रवासी संघटनांनी व्यक्त केला आहे. हवाई कनेक्टिव्हिटी वाढल्याने गुंतवणुकीच्या संधी वाढतील आणि जळगावचा सर्वांगीण विकास वेगाने होण्यास मदत होईल, असेही मत व्यक्त करण्यात येत आहे.
असे आहे वेळापत्रक :
- दिल्लीहून उड्डाण : सायं. ४.४० वा.
- इंदूरला आगमन : सुमारे ४५ मिनिटांत
- जळगावला आगमन : सायं. ७.५५ वा.
- जळगावहून परतीचे उड्डाण : रात्री ८.२० वा.
- दिल्लीला पोहोचण्याची वेळ : रात्री ११.२० वा.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989
ईमेल – sthaniksamacharbharat@gmail.com
