जळगाव जिल्ह्यात महिला व बालकल्याण विभागाच्या माध्यमातून १०५ नवीन अंगणवाड्या उभारल्या जाणार आहेत. लहान मुलांना सुरक्षित व आधुनिक सुविधा उपलब्ध करून देण्यावर भर.
जळगाव जिल्ह्यातील लहान मुलांसाठी आनंदाची बातमी असून जिल्ह्यात नव्याने १०५ अंगणवाड्यांच्या इमारती उभारण्यास गती मिळाली आहे. जिल्हा नियोजन व विकास समिती (डीपीडीसी) निधीतून या अंगणवाड्यांची बांधकामे केली जात असून यासाठी एकूण १५ कोटी ५० लाख रुपयांचा निधी उपलब्ध झाला आहे.
कामांना सुरुवात; ७६ अंगणवाड्यांचे कार्यादेश जारी
या प्रकल्पांतर्गत ७६ अंगणवाड्यांच्या बांधकामांचे कार्यादेश देण्यात आले असून कामांना प्रत्यक्ष सुरुवात झाली आहे. उर्वरित कामे टप्प्याटप्प्याने पूर्ण करण्यात येणार आहेत.
जिल्हा परिषदेच्या मुख्य कार्यकारी अधिकारी करिश्मा नायर यांनी या कामांचा आढावा घेत ४८ अंगणवाड्या मार्चअखेर पूर्ण करण्याचे, तर उर्वरित ५७ अंगणवाड्या जानेवारीपर्यंत पूर्ण करण्याचे निर्देश संबंधित यंत्रणांना दिले आहेत.
अनेक अंगणवाड्यांना स्वतंत्र इमारतींची प्रतीक्षा
जिल्ह्यात सध्या ३,६०० हून अधिक अंगणवाड्या कार्यरत असून त्यापैकी सुमारे ३,४०० अंगणवाड्यांना स्वतःची इमारत उपलब्ध आहे. मात्र अजूनही ७१ अंगणवाड्या शाळा, ग्रामपंचायत किंवा भाड्याच्या खोल्यांमध्ये भरविल्या जात आहेत. त्यामुळे सुरक्षित व स्वतंत्र इमारती मिळाव्यात यासाठी प्रशासनाने विशेष प्रयत्न सुरू केले आहेत.
निधीत वाढ; दर्जेदार बांधकामाला चालना
एका अंगणवाडीच्या बांधकामासाठी सुमारे ११ लाख २५ हजार रुपये खर्च येत असून आदिवासी भागातील अंगणवाड्यांसाठी १२ लाख ३० हजार रुपयांपर्यंत निधी मंजूर करण्यात आला आहे. यापूर्वी हा निधी ८ लाख ५० हजार रुपये इतका होता. डीपीडीसीकडून वाढीव निधी मिळाल्यामुळे आता अधिक दर्जेदार बांधकाम शक्य होणार आहे.
अतिरिक्त निधीची तरतूद
२०२५-२६ च्या नियोजनातून सुरुवातीला ९ कोटी ९९ लाख रुपये मंजूर करण्यात आले होते. त्यानंतर पुनर्नियोजनातून आणखी ५.५० कोटी रुपये उपलब्ध झाल्याने कामांना अधिक गती मिळणार आहे.
भविष्यातील नियोजन
महिला व बालकल्याण विभागाचे जिल्हा कार्यक्रम अधिकारी हेमंतकुमार भदाणे यांनी सांगितले की, उर्वरित ७१ अंगणवाड्यांसाठी सुमारे ८ कोटी रुपयांची आवश्यकता आहे. यासाठी २०२६-२७ च्या नियोजनात विशेष तरतूद करण्यासोबतच जुन्या अंगणवाड्यांच्या दुरुस्तीची कामेही हाती घेण्यात येणार आहेत.
कौस्तुभ शिंदे हे स्थानिक समाचार डिजिटल मिडिया चे संपादक असुन यांना पत्रकारितेचा १० वर्षाचा अनुभव आहे. कौस्तुभ शिंदे हे स्थानिक समाचार डिजिटल मीडिया चे सक्रिय योगदानकर्ता असून सामाजिक, राजकीय, शैक्षणिक आणि स्थानिक घडामोडींवरील बातम्यांचे वृत्तांकन करतात. जनसामान्यांच्या प्रश्नांना वाचा फोडणे, स्थानिक पातळीवरील महत्त्वाच्या घटनांची अचूक माहिती वाचकांपर्यंत पोहोचवणे आणि निष्पक्ष पत्रकारितेच्या माध्यमातून समाजाशी जोडलेले राहणे हा त्यांच्या लेखनाचा मुख्य उद्देश आहे. डिजिटल पत्रकारितेच्या माध्यमातून ते विविध विषयांवर सखोल आणि प्रभावी बातम्या प्रकाशित करतात. आपल्या परिसरातील बातम्या आणि जाहिरातींकरिता संपर्क करावा-
मो. क्र. +917507502989
ईमेल – sthaniksamacharbharat@gmail.com
